தொடரும் சம்பவம் !

சோதிடம்

2011-09-29T22:30:00.000-07:00

சோதிடர்களை நம்பி தன் மானத்தை இழந்த தமிழ் மக்களில் பலரில் நீங்கள் கீழ் காணும் செய்தி மிக வியப்பளிக்கும்.

ஆடைகளை துறந்து நாடு வீதியில் நள்ளிரவில் சென்று கோயில்களில் வழிபட்டால் தன் எண்ணம் நிறைந்த தன்னை நீங்கி ஓடிய காதலன் தனக்கு கிடைப்பான் அன்று சொன்ன பொய்யே வாழ்க்கையாக கொண்ட ஒரு கயமை குணம் கொண்ட சோதிடனை நம்பி இவள் தெருவில் இறங்கி நடந்து இருக்கிறாள்?

சோதிடம் பொய் என்று நாளும் எத்தனை தடவை சொல்லி கத்தினாலும் அது அறிவியல் என்று காசு பார்க்கும் மக்களின் குயுக்தியால் தம் வாழ்க்கை சீரழிந்த மக்களைக் கண்டேனும் நாம் திருந்தக் கூடாதா?

என் செயல் படி தான் எல்லாம் நடக்க வேண்டும் என்று என்னும் குறுகிய சிந்தனை கொண்ட மனம் தான் இவற்றுக்கு எல்லாம் காரணம்! எஹ்டையும் ஏற்றுக் கொண்டு தம் வாழ்வை மிக சிறப்பாக நடத்தி சென்ற எத்தனையோ மனிதர் வாழ்ந்த இவ்வுலகில் இப்படியும் மனிதர்கள்!

இந்த பெண் படித்து பயன். தன் அறியாமை நீக்கும் கல்வியில் காணாத உண்மையை இந்த சோதிடனின் வாக்கில் கண்டு விட்ட பைத்தியம் தான் இவள்!

காதலனை அடைவதற்காய் நிர்வாணமாய் கோயில்களுக்கு அலைந்த பெண்

ஓடம் கரையினிலே!

2011-09-28T03:34:00.000-07:00

வாழ்க்கை!

எங்கு போய் எப்போது நிற்கும் என அறிய

முடியாத ஒரு பயணம்!

துவங்கியதும் சில -நேரம், எடுத்த அடி வைக்கும் முன்னே

சில நேரம்!

இந்த பயணத்தின் முடிவில் என்ன இருக்கிறது?

எதை நோக்கியது இந்த பயணம்?

நோயில்,விபத்தில்,பொறாமையில், எனப் பல காரணங்கள்

பயணம் -விடுபட!

பயணத்தை முடித்தவர் யார்? பயணம் இந்த திசை தான் என அறிந்து

பயணித்தவர் தான் யார்?

எங்கேனும் ஒரு வழிகாட்டி நமக்கு வழிகாட்டும், திசைகள் பல!

குறிக்கோள் ஏதேனும் உண்டா நம் பயணத்திற்கு?

மாறிய குறிக்கோள்கள் எத்தனை என்று கணக்கில் வைக்க முடியுமா?

வீழும் நிலையில் இருக்கும் பலரை விடுத்து வேகமாக நகர்ந்து விட்டோம்!

நாம் வீழும்போது நம்மை கை கொடுத்து காப்பவர் யார்?

தங்கும் மடம் நிறைய வழி நெடுகும்!

அவை நம் பயணத்தை தள்ளிப் போடவா? இளைப்பாறவா?

அல்லது அந்த மடங்கள் தான் நமது பயணத்தின் இலக்கா?

இறந்து விட வேண்டும் !

2011-09-25T07:36:00.000-07:00

பட்டினத்தார் போல் என் மனம் எதன் மீதும் பற்று வைக்காமல் வாழ முடியுமா என்னால்?

இறப்பது நீண்ட தூக்கம் என்று சொல்லும் எல்லா மக்களும் தூங்குவது போல் மிக எளிதான ஒரு செயலாக இறப்பும் இருக்க ஒரு வழி சொன்னால் பரவாயில்லை!

இறப்பு என்பது தான் என்ன?

இந்த உடலை விட்டு உயிர் நீங்குவதா?

இந்த உடலில் உயிர் எங்கு உள்ளது?

உயிர்மெய் எழுத்தில் உயிர் எங்கு உள்ளது?

எழுத்தில் உயிர் இல்லை என்பதைக் குறிக்க தான் புள்ளி வைத்து அடையாளம் செய்கிறோமே தவிர உயிர்மெய் எழுத்தில் உயிர் தனியாக, அல்லது கலந்து இருப்பதைக் குறிக்க எதுவும் இல்லையே!

இயக்கம் இல்லாத உடலில் உயிர் இல்லை என்பதானால் ? இயக்கம் உள்ள எல்லாம் உயிர் கொண்டதா? சிந்தனை செய்யும் மனம் கொண்ட மனிதனுக்கு உயிர் இருக்கிறதா? பிற உயிர்களை நேசிக்கும் ஒருவனுக்கு இருக்கிறதா? உயிர்களை வெறுப்பவனுக்கா?

உயிர்களை வெறுப்பவனுக்கு உயிர் எதற்கு? வாழ்வியலையே எதிர்க்கும் சிந்தனை கொண்ட மனிதனுக்கு உயிர் இருப்பதன் பயன் என்ன?

இறந்து விட வேண்டும் என்று எண்ணுவது கோழைத் தனமா? அல்லது இறக்க துணிவு இல்லாததா? ஒருவேளை வேண்டும்போது எல்லாம் இறந்துவிட்டு மீண்டும் வேண்டும்போது பிறக்கமுடியுமானால் நம்மில் எத்தனை பேர் இது வரை செத்து செத்து விளையாடி இருப்பர்?

மனித மனம் ஏன் இறப்பைப் பற்றி சிந்திக்கிறது? நம்மை நேசிக்க யாரும் இல்லை என்றா? அல்லது இதுவரை தான் அன்பு காட்டிய ஒருவர் நம்மை புறக்கணிப்பதை தாள மாட்டாமையா? தனது இறப்பே தன்னை புறக்கணித்தவருக்கு தான் தரும் தண்டனை என்று நினைப்பது எந்த அளவில் சரி?

தன்னை முன்னிலை படுத்திக்கொள்ள நினைக்கும் மனதின் ஒரு போராட்டம் தான் தற்கொலையா? தான் அனுபவப்பட்டு அறியாத ஒன்றை ஏன் மனம் அடைய முனைகிறது தன்னால் மீண்டு வரமுடியாது என்று அறிந்தபின்னும்?

மானத்தின் பால் பற்று கொண்டு தன் மானத்துக்கு இழுக்கு வந்தபின்னால் வாழ விரும்பாமல் வடக்கிருந்து உயிர்நீத்த மனிதர்கள் நமக்கு சொல்ல முனைவது என்ன? இறந்து தன் இருப்பை உணர்த்தும் மாண்புடைய பெரியோர் பலர் வாழ்ந்த மண்ணில் தற்கொலை எண்ணி சிந்திக்கும் மனதை என்னவென்று சொல்வது? பல்லாயிரம் பேர் வாழும் இந்த மண்ணில் தனது வாழ்வை செம்மையாக வாழும் மனிதர்கள் எத்தனை பேர்? அதில் எத்தனை பேர் எத்தனை முறை இறப்பை வேண்டி இருப்பர்?

பிறவற்றின் மீது பற்று இல்லாமல் வாழ்வது இறப்பை நோக்கிய பயணமா? அல்லது வாழ்வை நோக்கிய பயணமா? பற்று இல்லாத நிலையில் மனது எதையும் முழுமையாக நோக்குவது உண்மை தானே? அப்படி எனில் அது முழுமையாக வாழும் வாழ்வாகுமா? அனுபவிப்பது வாழ்வா? தூர இருந்து பார்த்து உணர்வது வாழ்வா?

முழுமையான வாழ்வு என்பது எது? எப்போது மரணத்தை முழுமையாக மனது எதிர்கொள்ளும் பயமில்லாமல்?

இறப்பை நோக்கியதா? வாழ்வை நோக்கியதா? எனது இந்த சிந்தனை!
நான் சொல்ல முனைவது என்ன?

kaathalikka thodangivitten

2011-01-05T06:51:00.000-08:00

காதலிக்கத் தொடங்கிவிட்டேன்!

அவளின் இதழ்களின் நடுவே தெரிந்த பற்களின்
ஒளியில் கூசிய என் கண்களின் வழி புகுந்த அவளின் உருவம்
நிலைத்தது என் நெஞ்சுக்கூட்டில் (நினைவகத்தில்)

உணர்வற்று நின்ற எந்தன் நிலை அறிந்த அவள் என்
அருகமர்ந்து என்னை சேர்த்தணைத்து உள்ளத்து அன்பெலாம்
ஒன்று திரட்டி தந்தாள் ஒரு முத்தம் என் கன்னத்தில்!

அந்த முத்தத்தின் ஈரத்தில் என் உள்ளத்தில் பெற்ற புது உத்வேகத்தில்
அவளது இதழ் கவ்வி தேன் எடுத்தன எனது இதழ்கள்!
மலர்ந்த செந்தாமரை போன்ற அவளின் முகமலரின் பொலிந்த
அன்பினை எது கொண்டு நான் என்னுள் எடுத்துக் கொள்வேன்?

என் இதயத்தில் நிரம்பிய அன்பை முழுதும் அவளுக்கென்று சொல்லி
அவள்தரும் இனிய புன்சிரிப்பை விலையாகப் பெற்ற என் மனதில்
நிரம்பி வழியும் காதல் உணர்வை அவளின் மடியில் காணிக்கை ஆக்கி விட்டேன்!

என் கைகளில் சேர்ந்த அந்த மலர்ப் பூங்கொத்தின் நறுமணத்தை
எப்படி முழுதும் அடைவேன் சிறிதும் மிச்சம் இல்லாமல்?
அவளின் சிறு நகைப்பில் இழந்தேனே என் வாழ்வின் வலி எல்லாம்!
அவளின் சிறு ஊடலில் தவித்தது என் மனம் ஆறாத்துயரில்!

பெருவெளியில் கடவுள்?

2010-11-07T23:28:00.000-08:00

நமது பெருவெளியில் (பிரபஞ்சம்) கடவுள் இருக்க முடியாது! இது தான் ஸ்டீபென் ஹாகிங்க்ஸ் அவர்களின் The Grand டிசைன் எனும் நூலில் தெரிவிக்கப்பட்ட கருத்து!
இந்த பெருவெளியை உருவாக்குவதிலும், பேணுவதிலும் கடவுளின் தேவை ஒரு துளியும் இல்லை!
இது அறிவியலுக்கு ஏற்புடையதா? ஆம்! வேதாந்தத்துக்கு? ஆம்!
கீழே படியுங்கள்!
உங்கள் கடவுள் உங்கள் மனதிலும் வாழ்வதற்கு வழி இல்லை!

நமது கோட்பாடான எல்லைக்கு அப்பாற்பட்ட எல்லைகள் அற்ற கடவுள் இல்லை என்பது தான் இப்போது நாம் பெற வேண்டிய தெளிவு! இந்த எல்லைகளுக்கு வெளி வாழும் கடவுள் வாழவே முடியாது! என்பது மிக உண்மை!

நாம் வாழும் இப்பெருவெளி எல்லைகள் அற்றது. ஒருவேளை இருந்தாலும் எல்லைக்கு அப்பால் என்ன என்பது உடனே எழும் கேள்வி!

அது எதுவாக இருந்தாலும் அது இருக்க அங்கு ஒரு இடம் வேண்டும். அது வேறு ஒன்றும் அல்ல நமது பெருவெளியை எது தாங்குகிறதோ அதுவே அது! அதாவது நமது பெருவெளி எல்லைகள் அற்றது! எனவே கடவுள் இந்த பெருவெளியில் தான் இருந்தாக வேண்டும்!

இயற்பியலின்படி நமது பெருவெளியும் அதனுள் இருப்பதும் ஒரே பொருளால் ஆனது. இந்த ஒன்று தான் பெருவெடிப்பின்போது விரிவடைந்தது. அடர்த்தி வேறுபாடு காரணமாக சில பகுதி விரிவடையவில்லை. சில மிக பெரிதாக விரிந்தது. ஈர்ப்பு விசை காரணமாக அவை மேலும் விரிவடையாமல் அப்படி அப்படியே நிலைத்தன. எனவே, இந்த பெருவெளியில் உள்ளது எல்லாம் எதோ ஒன்றின் மாறுபட்ட வடிவ நிலைகளே! அதற்கு எந்த ஆற்றலும் இல்லை. ஒரு வேளை கடவுள் இருந்தால் இந்த மாறுபட்ட வடிவம் பெற்ற பொருளின் சிதைந்த ஒன்றாகத் தான் இருக்க இயலும். ஆகவே கடவுள் இந்த பெருவெளியில் இருக்க முடியாது. அதாவது அவர் இல்லை, இல்லவே இல்லை.

கடவுள் மனதிலேனும் வாழ முடியுமா? முடியாது! காரணம்-- மனித மனமும். பெருவெளியும் ஒன்றே! .. இது உபநிஷத்துக்களின் கூற்று.

ஒருவேளை கடவுள் ஒன்று இருந்தால் அது இந்தப் பெருவெளி தான்! யாரும் இந்தப் பெருவெளி இல்லை என்று சொல்ல முடியாது. இந்தப் பெருவெளியை எந்தக் கடவுளும் நடத்த வில்லை. இந்தப் பெருவெளியை , பெருவெளியே தன்னைத்தானே நடத்திக் கொண்டு இருக்கிறது.( காரணம் கணிதக் கோட்பாடுகளும், வடிவமைப்பு விதிகளும் தான்.) அதாவது அதனால் இதைவிட வேறாக இருக்க முடியாது. கணித விதிகளுக்குக் கட்டுப்பட்டது இந்த பெருவெளி!

இந்தப் பெருவெளியை நாம் கடவுளாகக் கொண்டால், நாம் இதிலிர்ருந்து மாற்றங்களையும், அழிபவகளையும் நீக்கி பேரு வெடிப்பு என்ற ஆரம்ப நிலையை எட்டுவோம். பெருவெடிப்புக்கு முன் இருந்தது வெற்று இடத்தில் இருந்த ஒரு பொருளே. அந்த பொருள் அதற்கு முன் இருந்த பெருவெளியின் சுருக்கமே!

வேதாந்தத்தின் கடவுளான பரமன் இந்தப் பெருவெளியே! விரிவுக்கும் சுருக்கத்துக்கும் மாறி மாறி சென்ற ஒன்றே.
The Chandogya Upanishad says: All that exists in space come out of space, live in space, and dissolve in space in the end. What make them come out of, exist in, and go back to space? It is the mathematical or geometrical necessity of that space, which is called Prakriti or Karma. Physics is marching towards Vedanta.

எது ஒன்று இந்தப் பெருவெளியில் இருந்ததோ அது ஒன்று இந்தப் பெருவெளியில் இருந்தே வெளிக்கிளம்பி அதிலேயே வாழ்ந்து, அதிலேயே முடிவுற்றது. இப்படி எல்லாம் இது தன் நிலை மாறக் காரணம்!???

வேறு என்ன? நாம் படித்த வடிவியல் கோட்பாடு தான்! கணித விதிகள் தான்!!

மீண்டும் ஒரு முறை அறிய முயலுங்கள் "" நாம் வாழும் இந்த உலகு ஏன் உருண்டை வடிவம் உடையது""

ஏன் சதுரம், உருளை, செவ்வகம்>>>> இல்லை.

புனேவிலிருந்து சென்னைக்கு டிக்கெட் வாங்கி கொடுங்க அப்பு!

2010-10-30T20:35:00.000-07:00

நானும் ரெண்டு நாளா எல்லா ஆன்லைன் தளங்கள் மூலமும் தட்கல் டிக்கெட் முயற்சி செய்து பார்கிறேன்!

irctc தவிர மத்த தளம் எல்லாம் 9 மணிக்கு தான் தட்கல் தருமாம்!

irctc ஒவ்வொரு கிளிக்கும் சர்வீஸ் unavailable 503 வருது. சரியாய் 8 :15 க்கு எல்லாம் வித்து போய்டுது?

railway மக்களே இது உங்களுக்கு ஞாயமா? ஏம்பா மக்காளகிய நாங்களும் பணம் கொடுத்து தானே வாங்கறோம்!
முன்பதிவு நிலையத்திலயும் டிக்கெட் வாங்க முடியாது! ஆன்லைன் மூலமும் நீங்க ஒழுங்கா டிக்கெட் விக்க மாட்டிங்க!

கம்முனு எல்லாத்தையும் இழுத்து மூடிட்டு உங்களுக்கு வேண்டிய மக்களுக்கு மட்டுமே டிக்கெட்டுன்னு எழுதி வைச்சிடுங்க சாமிகளா! அது என்னமோ agent மட்டும் மிக சரியா டிக்கெட் புக் பண்ண முடியுது
இன்னைக்கு ஒவ்வொரு தடவை login செய்து பார்க்கும்போது, காத்திருந்து டிக்கெட் புக் செய்யும் போது இருக்கைகள் எண்ணிக்கை மிக சரியா 50 குறையுது. சாதாரண நேரங்களில் இது போல் இந்த தளத்தில் காத்திருக்க தேவை இல்லை. இது நிச்சயம் சிஸ்டம் down என்று சொல்லவும் முடியாது! வேண்டும் என்றே எதோ செய்து கொண்டு
இருக்கிறார்கள்?

பெயர் எல்லாம் எழுதி இமேஜ் கப்ச எழுதி எல்லாம் செய்து சரியா அந்த go கிளிக் மட்டும் செய்ய முடியல. சர்வீஸ் unavailable என வந்துடுது! இது போல ஐந்து முறை மேல் செய்து விட்டேன்! எங்கோ ! எதுவோ!

ஒன்னு செய்யலாம்! தீபாவளிக்கு யாரும் பயணம் செய்யக்கூடாது? என சட்டம் போடலாம்!

பாப்போம்! இன்னம் ரெண்டு நாள் முயற்சி செய்வோம்! வெற்றி நம் பக்கம்?

சாதிப் பெயர்கள் !

2010-09-04T06:28:00.000-07:00

சாதிப் பெயர்கள் இந்தியா முழுவதும் உள்ள மக்கள் நீக்க முன் வர வேண்டும் என்று திரு அன்புமணி கட்டுரை எழுதினார்!
அதற்கு பதில் சொன்ன பெரும்பாலான மக்கள் அன்புமணிக்கு அந்த அருகதை இல்லை என்று தம் நிலை நின்றனர். யார் சொன்னார் என்பதை விட என்ன கருத்து என்பதை நிறுத்தி அதை சிந்தித்து அதன் பின் தங்கள் கருத்தை முன் வைப்பவர் நம்மில் அதிகம் இல்லை.

சாதிப் பெயர்கள் தங்கள் அடையாளங்களா?
சாதி தன் பெயரில் இருந்து நீங்கி விட்டால் சாதி சமூகம் விட்டு நீங்கி விடுமா? என்ற கேள்விகள் கேட்டு தம் செயலுக்கு நியாயம் கற்பிக்கின்றனர்.
தான் உயர் சாதி என்ற ஒரே காரணத்துக்காக மட்டுமே நிறைய பேர் தங்கள் பெயருடன் சாதியை சேர்த்துள்ளனர்! அதை சொல்வதிலும் பெரும் உவகை எய்துகின்றனர்.

என்னைப் போன்ற எத்தனையோ பேர் தங்கள் சாதி பெயர் சொல்லவே கூசவும் செய்கின்றனர், தங்கள் சாதி பல காலம் தாழ்த்தி வைக்கப் பட்ட காரணத்தால்! தம் பெயரிலேயே தங்கள் சாதி கொண்ட எல்லோரும் தம் சாதி மீது தம்மையும் அறியாமல் பரிவு கொண்டுள்ளனர் என்பது நம்மில் எல்லோருக்கும் தெரியும். எங்கோ சிலர் தம் பெற்றோர் கொண்ட பெயரின் காரணமாக இந்த சிலுவைகளை சுமந்து திரிகின்றனர். இவர்களேனும் தங்கள் பிள்ளைகளிடம் இந்த சிலுவைகளை தராமல் இருப்பார்களா?

தேவர்,பிள்ளை, நாடார், செட்டியார், சைவர், முதலியார், ஐயர், ஐயங்கார் என்று பலப்பல பெயர்களைத்தான் நாம் பார்த்திருப்போம். பறையர், சக்கிலியர் என்று எங்கேனும் கண்டு உள்ளோமா? ஏன்?

இட ஒதுக்கீடு என்ற ஒன்றை காரணம் காட்டி எல்லா உயர் சாதி மக்களும் தங்கள் வாழ்வு நலிந்து விட்டதாக புலம்பித் திரிகின்றனர். ஒரே ஒரு கணம் சிந்தியுங்கள்! ஒரு வேளை நீங்கள் -- தாழ்ந்து போய் உள்ள சமுதாயத்தில் பிறந்து இருந்தால்? உங்கள் பிள்ளை உங்களை விட்டு காணாமல் போய் யாரோ ஒரு தாழ் சாதி குடும்பத்தை அண்டி இருந்தால்?

விட்டு விலகுவோமே சாதியை பெயரிலிருந்தேனும்!

கவுண்டர்---

2010-05-28T21:41:00.000-07:00

//1902 ல் கந்தசாமிக் கவிராயர் இயற்றிய நூலை 2010 ல் கந்தசாமிக் கவுண்டர் தன்னுடைய பதிவில் ஏற்றுவது சாலப் பொருத்தமன்றோ! //

வேளாளர் புராணம் என்ற ஒரு கதை திரு கந்தசாமி எழுதி வருகிறார். இதன் முதல் பகுதியிலேயே நான் சொல்லி இருந்தேன். சாதிப் பித்து தான் எழுத வைக்கிறது என்ற கருத்தை ஒட்டி!

அதை நிரூபணம் செய்து உள்ளார் இந்தப் பெரியவர். சாதிப் பெயரை சேர்ப்பதை நம் மனத்தில் இருந்து அழிக்கப் பாடு பட்டனர் முன்னாள். இப்போது இவரைப் போன்று சிலர் செய்யும் செயலுக்கு நாம் என்ன சொல்வது? தனி மனிதனை சாடுதல் அறம் அல்ல என்பதன் காரணமாக இத்துடன்.

இப்படி சாதிப் பெயர்களை சேர்ப்பவர்களில் பெரும்பாலும் நம் சமூகத்தில் உயர்ந்த பிரிவு சேர்ந்தவர்களாகவே இருக்கின்றனர். மாறி வரும் சமூகத்தில் தம் உயர்வை எங்கே இழந்து விடுவோமோ என்ற எண்ணத்தில் இவர்கள் தூவும் தீய சிந்தனை எப்படிக் களையப் படும்?

இவர்கள் எப்போது மாறுவார்கள்? படிப்பு என்பது இதைக் கூட இவர்களுக்கு சொல்லித் தரவில்லையே!

மனிதனின் ஆறாவது அறிவு பகுத்து அறிதலே அன்றி மனிதர்களை பிரித்து வாழ செய்யும் சூழ்ச்சி காரணி அல்ல. இந்த உயர்ந்த சாதி எண்ணம் இவர்களின் குருதியில் ஊறி உள்ளது. இதை இன்னும் எத்தனை காலம் இவர்களின் தலைமுறை தாங்கி நிற்கும்?

சாதிகளை விட்டு வெளியே வாருங்கள். உங்களின் தோளோடு சேர கோடி மக்கள் உள்ளனர்.

எழுதுவது யாருக்கு?

2010-05-19T21:58:00.000-07:00

நாளும் பல பல செய்திகளை சுமந்து வருகின்றன வலைப் பதிவுகள். ஒவ்வொரு பதிவும் பல சிந்தனைகளின் தொகுப்பாகவோ, சீரியக் கருத்துகளின் வெளிப்பாடாகவோ வெளி வருகிறது.
தமிழ் வலைப் பதிவுகள் பல வகையான பொருட்களை மையமாகக் கொண்டு எழுதப் படுகின்றன.

பெரும்பாலானவை ஆன்மிகம், திரை, சமையல், சோதிடம் என்ற நான்கின் கீழ் அடங்கி விடும்.
கதை, கவிதை, கட்டுரை போன்ற புனைவுகள் சற்று எண்ணிக்கையில் சிறிதாயினும் அவையும் பலரைக் கவர்கின்றன. அனுபவம் என்ற பிரிவில் சில பதிவர்கள் தங்கள் நிகழ்வுகளைப் பகிர்கின்றனர்.

மிகச் சிலர் அறிவியல், அதை ஒட்டிய பரிணாமம், மேலும் நம்மை மேலும் சிந்திக்கத் தூண்டும் கருத்தாக்கங்களை முன் வைக்கின்றனர். பணம் பண்ணும் வழியாகவும் சிலர் தங்கள் பதிவுகளை செய்கின்றனர். இவற்றுள் சிலர் சோதிடத்தை இந்திய அறிவியலின் பரிணாமமாக முன்னுரைக்கின்றனர்.

ஹோமாபதியை witchcraft என்று சொல்ல முடிந்தது ஆங்கில மருத்துவர்களால். நம்மால் சோதிடத்தை மூடத்தனத்தின் அடையாளமாகப் புரிந்து கொள்ள முடியவில்லை.

சொல்ல வந்தது இவையல்ல. நாளும் பல்வேறுப் பொருட்களில் தங்கள் கருத்துகளை வைக்கும் பதிவர்கள் எழுதும் தமிழைப் பிழையின்றி எழுத ஏன் முனையவில்லை? எதோ ரயில்ப் பிடிக்கப் போவது போல் மிக மிக அவசரத்துடன் எழுதுவது போல் எழுதிச் செல்கின்றனர். நாம் எழுதியதை நிச்சயம் நாமாக அழிக்காதவரை நீண்டகாலம் அது இந்த வலை உலகில் வலம் வரும். நம் சிந்தனைகளில் மாற்றுக் கருத்து இருந்தாலும் எழுதுவதைத் திறனுடன் பிழையின்றி எழுதுவோமே! நானும் முயன்று பிழை இன்றி தான் எழுத விளைகிறேன்.

வடமொழிக் கலப்பு இல்லாமல் எழுதப் பழகுவோம் நாம். சில கட்டுரைகளைப் படிக்கும் போது ஏன் அதைக் கிளிக்கினோம் (எழுத்துப் பிழைகள்) என்ற கேள்வி வருகிறது. சிலவற்றைப் படிக்கும்போது நாமும் பிழையின்றி எழுதவேண்டும் என்ற எண்ணம் வளர்கிறது. திராவிட மொழிகளில் தமிழைத் தவிர மற்றவை வடமொழி ஆதிக்கத்துக்கு உட்பட்டு விட்டன. நாமாவது நம்மைத் தனித்து நிறுத்தி உயர்வோம். தமிழைத் தமிழிலேயே எழுதுவோம்.

நாளும் பல்வேறு பணிகளுடன் விடியலில் எழும் நாம் அந்த நாளின் முடிவில் நாம் முயன்ற அளவு செய்த பணிகளை நிறைவு செய்தோமா என்று எண்ணி சாய்ப்போம் தலையை!

முட்டினால் கொம்பு முளைக்கும்?

2010-04-10T03:54:00.000-07:00

ஒரு தடவை முட்டி, இன்னொரு தடவை முட்டாமல் விட்டால் கொம்பு முளைக்கும்!
இதை நம்பாதவர் கூட ஒரு வேளை நடந்து விட்டால்? என பயந்து இன்னொரு முறை முட்டிக் கொள்வது சிறு பிள்ளைத் தனம்? அல்லது குழந்தை மனம்?

நம் வாழ்வில் இது போல் எத்தனையோ செய்கிறோம். நமக்கு நன்றாகத் தெரியும்! சில நிகழ்வுகள் நடக்கவே முடியாது என்று! இருந்தாலும் நாம் விடுவதில்லை. சிறு பிள்ளைகள் போல் நடந்து விடுமோ என்று பயந்து நாம் நம்பமுடியா ஒன்றையும் நம்ப ஆரம்பித்து விடுகிறோம்!

நம் உலகை திட்டம் போட்டு ஒரு அதி புத்தி உள்ள ஒரு """""""", படைத்து இருக்குமா? இதற்கு விடை தேடுவது சரியா? என நான் இங்கு வினவ வரவில்லை.

அந்த அதி """""""" நம்மை ஆட்டி வைக்கிறான்! அவனை கால் கை பிடித்து கீழ் விழுந்து அழுதால் மனம் இரங்கி நம்மை ஆட்கொள்வான்? இது ?

இந்த """""""" தனக்கு வேண்டிய முகவர்கள் மூலம் அல்லது தம்மை உணர்ந்த அதி உன்னத ஆத்மாக்கள் மூலம் இந்த உலகில் வாழும் மனிதர்களை கடைத்தேற்றும் என நம்பி அவர்கள் காலில் விழும் நம் செயல்?

பிறப்பு முதல் நேரம் பார்த்து பார்த்து,,, ஒரு குறிப்பிட்ட அறிவார்ந்த? மனிதர் சொல்லும் எல்லாவற்றையும் நம்பி வாழும் நம் வாழ்வு சிறு பிள்ளைத் தனம் ?

சாமியார், சாமியாடி, பூசாரி, ஜோதிடர், பகவான்கள், இப்படி எல்லா மனிதர்களின் கூட்டு முயற்சியால் தான் நாம் வாழ்கிறோம் இறை அருள் பெற்று என இருப்பது?

முட்டினால் கொம்பு முளைக்கும் என நினைத்து இன்னொரு தடவை முட்டிக் கொள்வது வேடிக்கை தான் பார்ப்பது! அதையே நாம் தினம் தினம் செய்வது? நொடிக்கொரு முறை நாம் செய்யும் எல்லா செயலையும் இதே பயத்துடன் செய்வது ?

பரிணாமத்தை எந்த மதமும் ஏற்றுக் கொள்வது இல்லை. அது போல் எந்த கடவுளையும் மண்ணில் உள்ள உயிர்கள் நம்புவதில்லை( முட்டினால் கொம்பு முளைக்கும் என்று எண்ணும் நம்மைத் தவிர)

அறிவியல் எப்போதும் ஆய்ந்து சொல்லும் உண்மையை! ஆனால் அறிவு கொண்ட நாம் மூட எண்ணம் பரப்பும் சில விந்தை மனிதரின் வார்த்தைகள் அழகாய் இருக்கின்றன! ஒரு மயக்கம் தருகின்றன என்பதால் மயங்கி சாய்கிறோம்! அதை பூரணமாக நம்பி வாழ்கிறோம்!

கதைகள் எப்போதும் சுவை கொண்டவை! அதற்காக? கதையில் வரும் எல்லாம் நம் வாழ்வில் அடையலாம் என்பது மடமை இல்லையா?

நமது புராணங்கள் எல்லாமே நன்றாக புனையப் பட்ட கதைகள் என்று தெரிந்தும்? நாம் மயங்குவது எதற்கு?

எல்லா மனிதரும் ஒன்றே போல் சிந்திப்பது இல்லை. ஆனால் நமது சிந்தனை உண்மையின் வழிப்பட்டதாய் இருக்க வேண்டும்! ஒன்றும் ஒன்றும் எப்போதும் ஒன்று தான்!.. இல்லை என்று சொல்பவன் நிச்சயம் எங்கோ எதிலோ தவறு செய்து தான் இருக்க முடியும். நம் பிள்ளைகளையாவது முட்டினால் கொம்பு முளைக்கும்! என்பது நிச்சயமான ஒரு அழகு கொஞ்சும் மூடத் தனம்! என சொல்லி வாழ வைப்போம்.

மனித உயிரின் விலை?

2010-04-02T03:28:00.000-07:00

நம் சமூகத்தில் எல்லோரும் எதோ ஒரு கண்ணாடி அணிந்து கொண்டு தான் தம்மை சுற்றி உள்ள இந்த உலகை காண்கின்றனர்.
தாம் நினைப்பதே சரி! தம் எண்ணங்களே மேன்மையை நோக்கி செலுத்தும் கருவி என்றும் நினைகின்றோம்.
பிறரது கருத்தை எந்த வித சார்பு இல்லாமல் அணுகும் தன்மை நாம் இழந்து விட்டதன் அடையாளம் தான் நாம் பிறருடன் எந்த வித சிந்தனையும் செய்யாமல் உடனுக்கு உடன் விவாதம் செய்வது. தம்மை முன்னிலை படுத்த முயலும் அறியாமை!

கீழே உள்ள குறும் படம் நீங்கள் பார்த்திருக்க வாய்ப்பு உண்டு. இருப்பினும் சென்று பாருங்கள். காவல் துறையில் பணி செய்யும் ஒரு அதிகாரி தான் முன்னரே கொண்ட ஒரு
கருத்தின் அடிப்படையில் எதிராளியை எந்த வித இயல்பான காரணமும் இன்றி எதிராளியின் கூற்றின் உண்மைக் கருத்தை அறியாமல் அவர் செய்யும் செயலின் கேடு மிக எளிதில் விளங்கும் வண்ணம் காட்சி படுத்தப் பட்டுள்ளது.

ஒரு வேளை எதிராளி சொல்வது இவருக்கு ஏற்புடையதாக இல்லாத பட்சத்தில்?
சூழலின் காரணமே மனிதனை ஒரு முடிவுக்கு வரவழைக்கிறது. அதன் சரி, தவறு பற்றி அவன் அக்கறை கொள்வது இல்லை. திறந்த மனதுடன் ஒரு மனிதன் செயல்படும்போது தான் அவன் பணி அவன் வாழும் சமூகத்தின் வளர்ச்சிக்கு உதவுகிறது. சார்புடன் செய்யும் எந்த செயலும்?

தோட்டா விலை என்ன?,

வறண்ட நாட்கள்!

2010-03-22T12:14:00.000-07:00

கண்ணே! நீ இல்லாத இந்த நாட்கள் என்னைத் தனியனாய் அலையச் செய்கின்றன. விழித்தெழுந்த உடன் உன் இருப்பை உணர்த்தும் உன் நடை கேளாத எனது காதுகள் வலிக்கின்றன. அன்புடன் என்னை இழுத்து சென்று குளியலறையில் தள்ளும் நிலையன்றி என்னை நானே தள்ளி செல்லுதல் அத்தனை எளிதல்ல இப்போது.

குளித்து முடித்து வந்த உடன் என்னைக் கண்டு உன் தாமரை முகம் மலர புன்னகைப்பாய்! அது காணாமல் ஏன் கண்கள் நனைகின்றன?. உன் முகம் காணாமல் விடியலே உணர மறுக்கிறது உள்ளம். நான் போட்ட காப்பியை உன்னுடன் பகிர்ந்து அருந்தாமல் நானேப் பருகும் இந்த தனிமை மிக கொடுமை. நீ சமைத்து தரும் மணம் கமழும் பொங்கல் நான் சமைத்த போது கழுநீரில் இட்ட கஞ்சியானது!

உன் தோழிகள் உன்னைத் தொலைபேசியில் அழைத்த போது உன்னைக் காணாமல் வீடு முழுதும் தேடி அலுக்கின்றன கால்கள். உன் இருப்பே இல்லாமல் அலையும் இந்த நாட்கள் நீ இந்த வீட்டில் இருந்தபோது எனக்கு அமைந்த வசந்தங்களை நினைவூட்டும் வறண்ட நாட்களாக்கி விட்டு சென்ற நீ எப்போது மீண்டும் வருவாய்?

உன்னைக் காணாமல் வாடி நின்ற இந்த நெஞ்சம் நீ வரும் வழி நோக்கி காத்திருக்கும்!

மதங்கள் மனிதனை ஆளலாமா--- ஐம்பதாவது இடுகை நோக்கி!

2010-03-20T16:54:00.000-07:00

ஒவ்வொரு மத ஈடுபாடு கொண்டவரும் தன் மதத்தின் சிறப்பை மற்றவருக்கு விளக்க முனைவது சரியா?
இந்த கேள்விக்கு விடை நேரடியாக சொல்வது சிலருக்கு வருத்தம் தரும் நிச்சயம்.
அறிவியல் கருத்துகளை ஒரு மத நூல் சொல்கிறது என்பதற்காக மதம் உயர்ந்ததாகிவிடுமா?

அது சரி இது வரை எந்த மத நூல் அறிவியல் சொல்லி இருக்கிறது எனக் கேட்பவர்கள் மத நூலை துருவி துருவி தேடி மக்களைக் கவர முனையும் அன்பு பதிவர்களிடம் சென்று கேளுங்கள் வண்டி, வண்டியாக சொல்வார்.

டார்வின் கொள்கை ஒன்று இருக்கிறது. அது நிரூபணம் செய்யப்பட்டது/ உயிரியலின் அடிப்படையே அதன் மீது தான் என ஏற்றுக் கொள்ள மறுக்கும் கொள்கையின் மீது கட்டப் பட்ட மத நூல்களில் அறிவியல் கருத்து இருக்கிறது என்று தேடும் மனிதர் கடையில் சென்று சில நூறுகளில் கிடைக்கும் நல்ல அறிவு நூலை வாங்கிப் படித்தால் உண்மை விளங்கும் என அறியாரோ?

அறிவியல் என்பது என்ன? கேள்வியின் பதில்கள் தானே? யார் யாரோ கேட்ட கேள்விகளின் பயனை நாம் நுகர்ந்து கொண்டே இதை எல்லாம் நமக்கு நம் கடவுள் ஏற்கெனவே சொல்லி விட்டார் என்பது எத்தனை அறிவீனம்?

மத நூல் என்பது என்ன. நான் சொன்னது சத்தியம். நம்பு. நிச்சயம் நடக்கும் என சொல்லும் கண்மூடி மூட சிந்தனை தானே? இதுவரை எந்த மத தலைவனாவது உண்மை காண இது வழி என்று சொல்லி இருக்கிறார்களா? கேட்டால் கண்டவர் விண்டிலர்! விண்டவர் கண்டிலர்! எனும் தத்துவம்.

அதான் சொல்றவன் நிச்சயம் பார்த்திருக்க முடியாதுன்னு தெளிவா நீங்களே சொல்றிங்களே, அப்புறம் எதற்கு தெரு தெருவுக்கு பிரச்சாரம். எல்லா ஊடகங்களிலும்
எப்போதும் சொல்லி சொல்லி திரிகிறீர்கள்?. எங்கே சொல்லாமல் விட்டால் நமது வாழ்வு போய் விடும் என்ற பயம் தானே?

பெரியார் சொன்னார் மலத்தில் அரிசி தேடுவது போல்... மத நூல்களில் அறிவு இருக்கிறது என்பது என. இந்த உண்மையும் நம்மில் பலருக்கு தெரியும். இருந்தாலும்??

கற்பனையிலேயே இருந்த நம்மை ஒளியின் வேகத்தை அறிய வைத்த அறிவியலின் துணை கொண்டே நாம் நம் அறிவை மூடும் சிந்தனைகளை வளர்த்து வருகிறோம் என்பதை நினைத்தால் வெட்கமாக இருக்கிறது!

இறை தத்துவ நெறிகளைத் தேடும் மனிதர்களே, உங்கள் மன அமைதிக்கு வழி தேடும் மனிதர்களே, மறந்தும் பிறர் பொருள் மீது பற்று இல்லாமல் வாழ உங்களைப் பழக்கி கொண்டால் மனம் அமைதி பெற்று பாபா முதல், சாயா வரை கண்ட அமைதி நிலை நிச்சயம் உங்களை அடையும். அவர்கள் அமைதி கண்டார்களா என்பது வேறு விஷயம்!

ஒன்று தெரிந்து கொள்ளுங்கள். உங்கள் மனதில் நிச்சயம் நீங்கள் உண்மை என நம்புவது உண்மையாக இருக்க , பொய்யாக இருக்க வாய்ப்பு சம அளவு அது நிரூபணம் ஆகும் வரை!

ஐயோ! கடவுள் ஒரு வேளை இருந்துவிட்டால் நான் சொர்க்கம் போக வேண்டி விரதம் இருக்கிறேன் என்று நீங்கள் சொன்னால்? நான் பொறுப்பு அல்ல.

உணவு ,பண வீக்கம்-விலை வாசி நமக்கு ஏன் ?

2010-03-19T08:21:00.000-07:00

http://www.luckylookonline.com/2010/03/blog-post_17.html

இந்தப் பதிவில் சென்று பார்த்து இங்கு வரலாம்.

பண வீக்கம் என்ற அளவீடு தகுதிக்கு மீறி நம் கையை விட்டு எவ்வளவு அதிகம் செலவு என்பதன் அடிப்படையே. எந்த ஒரு நல ஆட்சியிலும் பண வீக்கம் 2 %க்கு அதிகம் ஆகாமல் இருக்கும். இது வளர்ந்த நாடுகளில் சாத்தியம். இங்கு நான் சொன்ன பண வீக்க விகிதம் "நுகர்வோர் உணவுப் பொருள்" விகிதம். உலகில் பண வீக்கம் கணக்கிடுவதும் நம் நாட்டில் கணக்கிடுவதும் மாறு பட்டது. இந்தியாவில் மொத்த கொள்முதல் விலைப் பண வீக்கம், சில்லறை விலைப் பண வீக்கம் என இரு வகை உண்டு. இரண்டுமே இப்போது இரட்டை இலக்கத்தில் நம் நாட்டில். நம் நாட்டு "நுகர்வோர் உணவுப் பொருள்" விலைக் குறியீடு 18% தாண்டி விட்டது. சிலக் குறிப்பிட்ட உணவுப் பொருட்கள் 50% தாண்டி.

இதே அளவில் வருமானம் உயர்ந்திருந்தால் இந்த எண் நம் கணக்கில் வந்திருக்காது. பண வீக்கமும் , வைப்பு நிதி வட்டிக்கும் தொடர்பு செய்து பார்த்தாலும் எளிதில் விளங்கும் நம் வருமானம் எங்கோ கரைகிறது என.

இரு வருடம் முன் நான் 100 மூட்டை அரிசி வாங்கும் பணம் வங்கியில் இட்டு இருந்தால் இன்று நான் அறுபது மூட்டை தான் வாங்க முடியும்?
அதாவது என் பணம் என் கை விட்டு போய் விட்டது. அதே பணம் கொண்டு நான் இந்த அரிசி மூட்டை வாங்கி பதப் படுத்தி வைத்து இன்று விற்று இருந்தால்?
இது தான் பெரிய பெரிய நிறுவனங்கள் செய்வது. பொருள் அதிகம் கிடைக்கும்போது வாங்கி பதுக்கி (அரசு கணக்கு கேட்கும் எவ்வளவு கையிருப்பு என, இவர்கள் பொய்த் தகவல் சொல்லி விடுவர்) அதன் தேவை மிக அதிகம் ஆகும்போது விற்பது. இதை அரசு கை கட்டி வேடிக்கை பார்ப்பது. சில நேரங்களில் அரசே அளவுக்கு அதிகமாக வைத்துக் கொள்ள சட்டம் இயற்றும்.

பங்கு வணிகத்தில் இந்த பணம் இட்டு இருந்தாலும் இதே நிலை தான் ஏற்பட்டு இருக்கும். கொஞ்சம் இழப்பாக இருந்தாலும் அது இழப்பே. அதாவது எல்லா இனங்களிலும் பங்கு பரிமாற்றம் 20% அதிகமாக
இலாபம் ஈட்டுவதில்லை. எனவே வருமானம் அல்ல. பங்கு வணிகம் பொறுத்தே நிறுவனங்களின் வருமானம். எப்படி நிறுவனங்கள் வருமான உயர்வு அளிக்க முடியும்? அதாவது பெரும்பாலான மக்களின் வருமானம் கடந்த இரு ஆண்டுகளாக அதிகம் உயர வில்லை. அதே சமயம் பண வீக்கம் அதிகமாகிறது. அதாவது அவர்களின் அன்றாட செலவு அதிகமாகிறது. இது நிச்சயம் பொது மக்களை பாதிக்கும் விஷயம். அவனது எதிர்கால சேமிப்பு குறைவது மட்டும் இல்லாமல், அவனது சேமிப்பின் மதிப்பும் பாதாளம் செல்லும்.

உண்மை சொல்லப் போனால் நம் அரசின் கையால் ஆகா செயலே இந்த பிரச்னைக்கு காரணம். தங்கள் கையிருப்பில் நிறைய தானியம் இருந்தும் விலை ஏற்றம் சாத்தியமாகும் அளவு இருக்கிறது. எந்தப் பொருட்களுக்கு கட்டுப்பாடு விதிப்பது? எனவும் தெரிய வில்லை. அரசு online trading கட்டாயம் தடை செய்ய வேண்டும். மேலும் ஊக வணிகம் தடை செய்யப் பட வேண்டும். நாளிக்குப் பொறக்கப் போற பிள்ளைக்கு இன்னைக்கே பேர் வைக்கறது தான் ஊக வணிகம் என்பது நீங்கள் அறிவீர். ஊக வணிகமே தேவை இல்லாத தேவையை உருவாக்கி பொருளின் விலை ஏற காரணமாகிறது. பஞ்சாபில் விளையும் கோதுமைக்கு இங்கு இருந்தே விலை நிர்ணயிப்பது. இதன் மூலம் தேவை இல்லா போட்டி உருவாக்கி விலை உயரச் செய்வது. அந்த விலை உயர்வையும் விவசாயி பெற விடாமல் தாங்களே அனுபவிப்பது தானே ஊக நிறுவனங்களின் செயல்பாடு?

நேற்று வரை மளிகைக் கடை வைத்து தம் ஊரில் கிடைக்கும் பொருட்களை கொண்டு விற்பனை செய்த கடைக் காரனை துரத்தி விட்டு புதிய புதிய வணிக வளாகங்கள் உருவாக்கி விலைகளைத் தாங்களே நிர்ணயம் செய்யும் பெரிய பெரிய நிறுவனங்களினால் தெருவில் நின்ற இவர்களின் நலன் காக்க முனையாத அரசு? தெருவில் அலைந்து ஐந்து ருபாய் கீரைக் கட்டை பேரம் காரணமாக மூன்று ரூபாய்க்கு விற்று விட்டு வீடு சேரும் மூதாட்டியின் இரவு உணவு என்ன? தமிழ் நாடு அரசின் ஒரு ரூபாய் அரிசி சோறு தானே?

நித்தி , சித்தி , ஹுசைன்

2010-03-17T02:17:00.000-07:00

நித்தியப் பத்தி பத்திரிக்கைக் காரங்க எழுதிக் காசப் பார்கிராங்கனு சொல்லிக் கிட்டே சில பேர் இடுகை இட்டு பெரும் பேர் சம்பாதிக்கிறாங்க.
நம்ம இடுகை "தமிலிஷ் போபுலர்" அப்படின்னு ரெண்டு நாளைக்கு இருக்கணும்னு நினைச்சா நித்தி பத்தி அவதூரா ஒரு இடுகை? இல்லை, இல்லை,. காலம் மாறிப் போச்சு
.

இப்பல்லாம் நித்திக்கு வக்காலத்து வாங்கறவங்களுக்கு தான் ஹிட்டு. என்ன அழகா கேகுராங்கயா கேள்வி?

நித்தி பத்தி யாராவது தப்பா சொல்றவங்க அவர் நடத்துற கிளாஸ் போய் வந்து இருக்கணுமாம்ல. அது தான் அடிப்படை தகுதியாம்? சொல்லிக் கொடுத்தது தப்புனாலும்
வாத்தியாரைக் குறை சொல்லக் கூடாதாம்! நித்திக்கு இப்படி எல்லாம் சீடர்கள்? ஒரு வேளை நித்தி செஞ்ச ஆராய்ச்சி இவங்க சீடர்களும் செஞ்சுப் பார்துருப்பாங்க போல?

இதுக்கு நடுவால ஸ்ரீ ஸ்ரீ ஸ்ரீ....... ரவிசங்கர் ?? ஏங்க! இவர் பத்திய கதை வெளில வருலனா இவர் பெரியவரா? நித்திக்கு ஒண்ணுல மயக்கம்னா.. இவருக்கு ஒண்ணுல மயக்கம். நமக்கு தெரியற வரைக்கும் இவர் ஸ்ரீ ஸ்ரீ. ...........

கேவலம் பேருலயே இத்தனை ஸ்ரீ. அது என்னங்க விஷயம்? ஒரு ஸ்ரீ போட்டா போதாதா?
புகழ் தேடும் ஆட்கள் சூழ்ந்த இந்த சமூகத்தில் இப்படி தான் வாழணும்னு சொல்லித் தராராம்.

நித்தி மேட்டருக்கு வருவோம். எப்போதாவது இடுகை படிக்காலாம்னு வந்தா நித்திக்கு ஆள் சேர்க்கும் கூட்டம் எழுதுவது என்னை எழுத தூண்டி விட்டு விடுகிறது!

பீஸ் போன பல்ப வச்சுக்கிட்டு இன்னம் எவ்வளவு நாளைக்கு ஆடுவாங்கப் பாப்போம்.

சிலருக்கு நிம்மதி சரக்கடிகறது. சிலருக்கு நிம்மதி ஆப்பு அடிக்கிறது, சிலருக்கு நிம்மதி அடிச்ச ஆப்ப புடிங்கி விடறது. சிலருக்கு நிம்மதி இதை வச்சு பேர் வாங்கறது?
எப்படி நம்ம நிம்மதி உங்கள் சாய்ஸ்?

இன்னொரு செய்தி. ஹுசைன் பற்றிப் பேசணும்னா ஓவியம் பத்தி தெரிஞ்சிக்கிட்டு பேசணுமாம். ஆமாம். உண்மை தான், புகழ் சேர்த்தவன் எது செஞ்சாலும்
அதில் ஒரு அர்த்தம் இருக்கும். அதே நம்ம ஆளுங்க செஞ்சா மக்க தொலைஞ்சாங்க.
இல்லனா பெரிய பெரிய மன நல மருத்துவர் எல்லாம் கூட நிப்பாரா? ஒரு வேளை மன நலம் சரி இல்லாத ஹுசைனுக்கு வைத்தியம் பார்க்கணும்னு சொல்லாம சொல்றாரோ?

கடவுள் இல்லடா மக்கா! போய் தொழில் செய்டானு சொன்னா பைத்தியக்காரன். அதுவே இவன் கும்புடுற கடவுள அசிங்கமா வரைரவனக் கொண்டு வந்து தலை மேல் வச்சு ஆடுவாங்க . கேட்டா மத நல்லிணக்கம், ஏலே? என்னாலே இது?

தலைப்புல சித்தி இருக்கு, இங்க இல்லையேன்னு பார்கறீங்களா? அது வரணும்னா யாராவது சாமியாரப் போய் பாருங்க கண்ணுங்களா! இல்லனா நம்ம வீட்டுத் தொலைகாட்சி பாருங்க. வரும் சித்தி

மக்களே? எனக்கும் கொஞ்சம் vote பண்ணிட்டுப் போங்கோ. நாமளும் பிரபலம் ஆய்டுவோம்!

எலி ஏன் அம்மணமா ஓடுது?

2010-03-14T03:40:00.000-07:00

josiyam?

மேலே இணைப்புக் கொடுத்தப் பதிவை சென்று பார்த்து வாருங்கள்!
என்னோட பதிவுக்கே எந்தப் பதிவரும் வரத்து இல்ல. இதுல நான் சொல்ற பதிவை பார்க்கவாப் போறீங்க? இருந்தாலும் நான் சொல்கிறேன் .

ஜோசியர் சொல்றது உண்மையாப் பொய்யான்னு அலசி ஆராய்ந்து விட்டார் அந்த இடுகையில் .
உண்மை என்று வைத்துக் கொண்டு ஒரு விளக்கம்.
பொய் என வைத்து ஒரு விளக்கம்.
இறுதியில் வைத்தாரே ஒரு ஆப்பு. " ஜோசியர்கள் சிறந்த மனோதத்துவ நிபுணர்கள்! அவர்கள் உண்மை கசப்பாக இருந்தால் அதை மறைத்து உங்களை ஆற்றுபடுத்தும் நோக்குடன் சில செய்திகளை சொல்லி உங்களை நலம் பெற்று வாழ வைத்து உங்கள் எதிர்காலம் கணித்து தருவர்"?

ஜோதிடர்களை டாக்டர்களுடன் சரிசமமாக வைத்து வாதிடுகிறார் இங்கு.

அதாவது நீங்கள் வாழ்ந்த இத்தனை நாள் வாழ்க்கை , இனி நீங்கள் வாழப் போகும் வாழ்க்கை, அது மட்டும் இல்லாமல் உங்கள் ஆத்தா, அப்பன், வகையறா, கூடப் பொறந்த வகையறா, வாழப் போறவன், போரவ வகையறா நீங்க டாக்டர், engineer என எல்லாவற்றையும் நீங்கள் பிறந்த அந்த நேரம் வைத்துக் கணிக்கும் திறன் பெற்ற நல்ல(முழுமையான ) ஜோதிடர் இந்த உலகில் உள்ளார் என்று சொல்வது யார் காதில் சுற்றும் பூ?

அடுத்த இடுகையில் இதை விட மேலாக ஒன்று . அதை நான் இங்கு ஒட்டுகிறேன்.

"கோள்களின் நிலைக்கும் ஒருவனுடைய வாழ்க்கைக்கும் நெருங்கிய தொடர்பு இருக்கிறது என்றும், அந்த தொடர்பை கணித்து தனிமனிதனின் வாழ்க்கையின் எதிர்காலத்தைச் சொல்ல ஒரு நல்ல ஜோதிடனால் முடியும்" என்றும் முந்தைய பதிவில் பார்த்தோம். எனத் தொடங்கி அரை குறை ஜோதிடர் பற்றி பேசி அவர்களும் நமது நன்மைக்கே என வாதிட்டு அமைகிறார்.

இதற்கு மேல் இன்னொரு இடுகை இட்டு இந்த தொடரை நிறைவு செய்வாராம்.
இதை எல்லாம் விட வேடிக்கை தனது வலைப் பக்கத்தில் கீழ்க்கண்ட தொடரும் வைத்து உள்ளார்.

நாளென்ன செய்யும் கோளென்ன செய்யும் முருகனை வழிபடுவோர்க்கே!

எலிக்கு யாரும் ஜோசியம் பார்ப்பார்களா?
நம் ஆட்கள் எதற்கும் ஜோசியம் பார்ப்பார்கள்.
நீங்கள் செய்யவேண்டியது இவ்வளவு பணம் என அவர்கள் கேட்பதை அனுப்பி ஒரு நேரம் குறித்துக் கொடுத்தால் போதும்.

பிறந்தது ஆணா, பெண்ணா என்பதையே நீங்கள் கொடுத்த நேரம் வைத்து சொல்லத் தெரியாதவர்கள் வேறு எது சொல்வார்கள் என்று பின்னால் போகிறீர்கள்?

ஜோதிடத்தைத் தொழிலாகக் கொண்டு இடுகைகள் எழுதுவோரை விட்டு விடலாம். ஆனால் இது போல் எழுதி என்னைப் போல் அரைகுறை நம்பிக்கை உள்ளோரை முழு மூடராக்கும் மனிதர்களை பார்த்து என்னால் சகிக்க முடியவில்லை.

இதைப் போல் நானும் எழுதுவேனோ எப்போதேனும் ?

2010-03-13T13:52:00.000-08:00

குளியலறைக்குப் போய்ச் சந்தனச் சோப்புப் பூசி உடல் குளிர நீராடி வேறு நல்ல புடவை மாற்றித் திலகமிட்டுக் கொண்டாள் அவள். கண்களுக்கு ஆசையோடு மையும் தீட்டிக் கொண்டாள். அவள் அப்போது அந்த நள்ளிரவில் தனக்குத்தானே செய்து கொண்ட காரியங்களுக்கு ஏதோ ஓர் அர்த்தமிருக்கிறாற் போலவும் தோன்றியது. அவள் அப்போது தான் பரிபூரணமான சந்தோஷத்தோடு இருப்பதாகவும் உணர்ந்தாள். அப்படி உணர்ந்த மறுகணமே அதன் மறுபுறத்தில் பரிபூரணமான துக்கத்தையும் உணர்ந்து அநுபவித்தாள். இருளில் தட்டுத் தடுமாறித் தோட்டத்துக்கு ஓடிப்போய் அரைகுறையாக மலர்ந்திருந்த இரண்டொரு ரோஜாப் பூக்களையும், அடுக்கடுக்கான குடை மல்லிகைப் பூக்களையும் பறித்து ஈரக்கூந்தலை முடித்து அதில் சொருகிக் கொண்டு வந்தாள். ஏதோ நினைத்தவளாக உள்ளே போய்த் தேடி எடுத்து அரங்கேறிய நாளிலிருந்து தன் பட்டுப் பாதங்களை அலங்கரித்த அந்தச் சலங்கைகளையும் பாரதி எழுந்து விடுவாளோ என்ற பயத்தோடு காலில் ஓசைப்படாமல் அணிந்து கொண்டாள். இந்தப் பாழாய்ப் போன உலகத்துக்குப் புகழோடும், பெருமையோடும், தான் அறிமுகமாகக் கருவியாக இருந்த எல்லாவற்றையும் தன்னோடு சேர்த்து எடுத்துக் கொண்டு போய்விட வேண்டும் போல ஓர் ஆசை அப்போது அவளுள்ளே எழுந்து தவித்தது. மேஜை விளக்கருகே கையைக் கொண்டு போய்ப் பட்டுப் புடவைத் தலைப்பினால் தன் விரலிலிருந்த மோதிரத்தைத் தேய்த்துப் பளபளக்கச் செய்த பின் அதன் பொன்னொளியில் தன் முகத்தைப் பார்த்த போது அந்த மோதிரத்தை அணிவித்த தெய்வத்தின் ஞாபகம் வந்து மனத்தைப் பிசைந்தது. அவளுடைய சலங்கையணிந்த பாதங்கள் உடனே எங்கோ புறப்பட்டுப் போய்விட வேண்டும் போல் துடிதுடித்தன. மைதீட்டிய விழிகள் யாரையோ பார்க்கப் பறந்தன. சிவந்த உதடுகள் யாரிடமோ புன்முறுவல் பூக்க நெகிழ்ந்தன. கமலக் கைகள் யாரையோ வணங்க வேண்டும் போலக் குவிந்து கூப்புவதற்கு முந்தின.

deal or no deal?

2010-03-13T12:35:00.000-08:00

வேளை வெட்டி இல்லாமல் நிறைய தமிழ் தொலைக் காட்சி தொடர்களைப் பார்க்கும் தமிழ் மக்களில் நானும் ஒருவன் என்பதை சொல்லிக் கொள்வதில் மிக்க மகிழ்ச்சி அடைகிறேன்!
இன்று வந்த டீலா நோ டீலா நிகழ்ச்சியும் பார்த்து விட்டேன். இந்த நிகழ்ச்சி என்னை கவர்வதற்கான காரணங்கள் சில.

௧. பணம் எனக்கேக் கிடைப்பதைப் போன்ற எண்ணம்.
௨. நிகழ்ச்சியில் தொலைக் காட்சி சார்பாக நிறுத்தப் படும் பெண்கள்
௩. போட்டியாளர் தன் முன்னால் இருக்கும் வாய்ப்புகள் கொண்டு முடிவு எடுக்கும் நிலை
4. தங்களது அதிர்ஷ்ட எண் எனக் கூறிக்கொண்டு பெட்டி எடுத்து வைக்கும் போட்டியாளர்கள் சிறிது நேரத்தில் நம்பிக்கை இழப்பது!
5. ஒவ்வொரு தடவை பெரிய தொகை கொண்ட பெட்டி விளையாட்டில் இருந்து நீக்கப் படும்போதும் எதோ தன் பணமே தன் முன்னாலே திருடப் படுவது போல் கலங்க வைக்க முயலும் நிகழ்ச்சி நடத்துனர்.
6. இது போதும் என நினைக்கிறேன்

தமிழ் தொலைக் காட்சிகளில் நிகழ்ச்சித் தொகுப்பாளர் தமிழில் பேசுவதும், நிகழ்ச்சி முக்கியக் கூறுகள் தமிழில் இருக்கும் என எதிர்பார்ப்பதும் நம் முன்னால் கடவுள் தோன்றுவார் என நாம் எதிர்பார்ப்பது போல் ஆகும். எனவே அதை விட்டு விடுவோம்.

ஆனால் தப்பித்தவறி போட்டியாளரோ, அவருடன் வந்தவரோ தமிழில் பேசி விட்டால் அவர்களைக் கிண்டல் செய்வார்கள் என்பதற்கு இன்றைய நிகழ்ச்சி ஒரு காட்டு !

அப்படி என்ன நடந்தது?

போட்டியாளருக்காக ஒரு நண்பர் "பெட்டி எண் ஏழு" என்று உதவி செய்தார். உடனே தொகுப்பாளர் என்ன language நீங்கள் பேசியது எனக் கேட்டக் கொடுமை/சிறப்பு ?
ஏனென்றால் இவர்கள் நாகரிகப் படி " please open the box no 7" என்று சொல்ல வேண்டுமாம்.
அதற்கு ஒருவர் விளக்கம் அளித்தார் அது சுத்தத் தமிழ் ... நன்றாக வீசுகிறது நம் தமிழ் மணம்!

பெரியார்தாசன்

2010-03-13T05:56:00.000-08:00

தாசன் இந்தப் பெயரே அடிமைத் தனத்தின் வழியாகவும் , அன்பின் வழியாகவும் பார்க்கப் படலாம். பெரும்பாலானவர்கள் தாங்கள் யாருடைய கொள்கையின் பால் மிக ஈர்க்கப்பட்டனரோ அவர்கள் பெயருடன் இந்த தாசனை சேர்த்தனர். இவர்களில் எல்லோரும் பெயரில் மட்டுமா? என்பது வினா?

கண்ணதாசன், பாரதிதாசன், சுரதா என நிறைய பேர்கள் சமூகத்தில் உண்டு. பெரியார்தாசன் இந்த பெயரும் நம் சமூகத்தில் நன்கு அறியப் பட்ட ஒன்று. கருத்தம்மா உள்ளிட்டப் படங்களில் நடித்த பெரியார்தாசன் எனப் பெயர்கொண்ட நாத்திக வாதியாக அறியப் பட்ட ஒரு மனிதர் தான் இத்தனை நாள் கைகொண்ட ஒரு கருத்தாக்கம் தனக்கும் சமூகத்துக்கும் பயன் அளிக்காது என்பதை உணர்ந்து கூறியதாக ஒரு செய்தி வந்துள்ளது!

ரியாதில் நடைபெற்ற செய்தியாளர் சந்திப்பில் தான் இஸ்லாத்தைத் தழுவியதை அவர் பகிரங்கமாக அறிவித்தார்.

தான் பல மதங்களையும் ஆய்வு செய்ததாகவும் அம்மதங்களின் வேதங்கள் நேரடியாக இறைவனிடமிருந்து அருளப்படவில்லை என்றும் திருக்குர்ஆன் மட்டுமே இறைவனிடமிருந்து அருளப்பட்ட வடிவில் இன்றும் பாதுகாப்பாக இருப்பதாகவும் அவர் தெரிவித்தார்.

"நான் ஊரறிந்த நாத்திகனாக இருந்தேன். பிறகு மத நம்பிக்கை தான் இவ்வுலக மற்றும் மறுவுலக வாழ்விற்கு உகந்தது என்று உணர்ந்தேன். இந்த தேடல் என்னை இஸ்லாத்திற்கு அழைத்து வந்தது" என்றும் அவர் ரியாதில் செய்தியாளர்களிடம் தெரிவித்தார்.அல்ஹம்துலில்லாஹ் எல்லாப்புகழும் அல்லாவுக்கே...

எங்கோ எதுவோ பிழையோ? யார் செய்த பிழை? ஒரு நாத்திகமான சிந்தனை உடையதாக சொல்லப் பட்ட ஒரு மனிதர் ஒரு குறிப்பிட்ட மத நூல் மட்டும் உயர்ந்தது என்னும் கொள்கைப் பிடிப்பு பெற எது காரணம்?

நான் இவரைப் பற்றி தாக்கி இங்கு எதுவும் எழுத முயலவில்லை. தனி மனிதனும், சமூகமும் நிறைவுடன் வாழ மதம் அவசியம் என்பது போல் ஒரு கருத்தாக்கத்தை ஒரு தத்துவ வாதி என சொல்லப் படும் மனிதர் ஏற்கிறார் என்றால்?

இத்தனை நாள் தான் கொண்ட கொள்கையைப் பற்றி சிந்திக்காதவரா? அதைப் பற்றி எந்த ஒளிவு மறைவும் அற்ற ஆய்வு செய்தவரா? அப்படி இல்லாதவர் எப்படி அந்த கொள்கையுடன் பற்றுடன் இருந்திருப்பார்? புகழுக்காகவா? இப்போது மாறியதும் அதற்காகவா?

பெரியார் எப்போதும் தான் சொன்னதை யோசித்து சரி என கொண்டால் மட்டும் ஏற்றுக் கொள்ளுங்கள் என்ற சொல்லியக் கருத்துகளில் ஈர்ப்பு ஏற்பட்டு தன் பெயர் மாற்றிக் கொண்ட மனிதனின் உண்மை முகம் எது?

போலிச் சாமியாரைப் பார்த்த நாம்? இன்று யாரைப் பார்க்கிறோம்?

வன்புணர்வுக்கு உள்ளான பெண் விரும்பினால் காரணமானவனையே மணக்கலாம்!

2010-03-08T04:32:00.000-08:00

இந்திய உச்ச நீதி மன்ற நீதிபதி கருத்தைப் பாருங்கள்! இது அவரது கருத்தாக இருப்பதால் அதைப் பற்றி இங்கு நம் கருத்தைக் கூறுவது நிச்சயம் நீதிமன்ற அவமதிப்பு அல்ல!

எப்போது மாறும் நம் ஆணாதிக்க மனோபாவம்?
ஆணாதிக்க சிந்தனையின் வெளிப்பாடு தான் " வன்புணர்வுக்கு உள்ளான பெண் விரும்பினால் காரணமானவனையே மணக்கலாம்!" கற்பு --என்ற சித்தாந்தம் உருவாக்கிய வெளிப்பாடு தானே இது?
தன் உணர்வுகளை மதிக்காத ஒரு மிருக மனம் பெற்ற மனிதன் தன்னை உடல் அளவில் அணுகிய ஒரேக் காரணம் பற்றி, அவனை மணந்து கற்பு நெறிக் காக்க வேண்டும் என்ற சிந்தனையின் வெளிப்பாடு?

கேவலம் பெண்ணின் கற்பு அவளின் உடம்பா? அவளின் மனத்திற்கு ஒன்றும் தொடர்பு இல்லையா? எந்த ஒரு பெண்ணாவது தன்னை ஒரு விலங்கு போல் கைக்கொண்ட மனிதனை ஏற்றுக் கொள்ள விளைவாளா?

விளைவாள்! எப்போது தெரியுமா?
நம் சமூகம் அந்தப் பெண்ணிடம் விதைத்த கற்பு பற்றிய சிந்தனையையும், அதன் மூலம் எழும் எண்ணங்களையும் கொண்டு அவள் முடிவு எடுக்கும் நிலைக்கு தள்ளப்படும்போது!

ஏன்? இந்த நாட்டில் வேறு நல்ல ஆண்களே கிடைக்கமாட்டரா அந்தப் பெண்ணுக்கு?
உன்னை துன்புறுத்திய மனிதன் மனிதனே அல்ல! அவனைப் பற்றிய எண்ணங்களை நீக்கி புது வாழ்வு நீ அடைய நாங்கள் துணை நிற்போம் என சொல்லாதா இந்த சமூகம்? நம் திரைகளில் காணும் நாட்டாமைத் தீர்ப்பா நம் சமூகம் சொல்லவேண்டும்?

ஒரு வேளை மனமாகாதப் பெண்ணுக்கு இந்த உபதேசம் சொல்லப் பட்டு ஏற்றுக் கொள்ளப்பட்டது! மணம் செய்து தன் கணவனுடன் அன்புடன் வாழ்ந்து பிள்ளைகள் பெற்ற பெண்ணுக்கு?
அவள் கற்பு என்னும் அணிகலன் இழந்தவளா? இவள் இனி யாருடன் வாழ வேண்டும்? இதையும் இப்பெண்ணுக்கு இந்த சமூகம் தான் திணிக்குமா?

பெண்களே! ஒன்று தெரிந்து கொள்ளுங்கள்! உங்கள் வாழ்வு உங்கள் கையில்! உங்கள் சிந்தனை பழம்பஞ்சாங்கத்தில் இருந்து வரக் கூடாது. பாரதி கண்ட புதுமைப் பெண்ணாக சிந்தியுங்கள்! உங்கள் உறவில் யாரேனும் இப்படி வன்புணர்வுக்கு ஆளானால் அப்பெண்ணுக்கு துணை நின்று அப்பெண்ணுக்கு நல்வழி காட்டி வாழுங்கள்! உங்களை துன்புறுத்தியவனை விட நிச்சயம் நல்ல மனிதன் உங்களுக்கு கிடைப்பான். நம்புங்கள்! விட்டு விலகுங்கள்! அழுக்கான சிந்தனை விட்டு!

"ஹிந்து மதம்--அறிவியல் பூர்வமானது"

2010-03-08T01:55:00.000-08:00

ரொம்ப நாளாவே நான் பார்க்கும் ,கேட்கும் இடங்களில் எல்லாம் ஒரு பேச்சு வரும்
"ஹிந்து மதம்--அறிவியல் பூர்வமானது"

1 . இப்படி சொல்றவங்களுக்கு அறிவியல்னா என்னனு நிச்சயமாத் தெரியுமா?
2. ஒரு வேளை நியூட்டன் விதி போன்ற விதிகளின் தொகுப்பு தான் அறிவியல் என நினைத்து இப்படி சொன்னால் இவர்கள் சொல்வது சரிதான்.

ஏனெனில் உலகில் உள்ள எல்லா மதங்களும் விதிகளின் தொகுப்பு தான். ஆனால் இவர்கள் ஒன்றைப் புரிந்துகொள்ள வேண்டும். அறிவியலின் எந்த விதியையும் யாரும் எந்த நேரத்திலும் கேள்வி கேட்டு சோதனை செய்து நிரூபிக்கலாம். அதற்கு, இந்த ஜாதியில் பிறந்து இப்படி வாழ்ந்து இருக்க வேண்டும் என்ற பிறப்பின் வழி தகுதி நிர்ணயம் இல்லை.

ஹிந்து மதத்தில் ஏன் பிறப்பின் மூலம் ஒருவனின் வாழ்வில் நிர்ணயம் செய்கிறீர்? அப்படி அதில் என்ன அறிவியல் இருக்கிறது?
அய்யனுக்குப் பிறந்தா அய்யன்? பிறக்கப் போறது பெண் குழந்தையா ஆண் குழந்தையா என்பதையே ஜோசியக்காரனிடமும், குறி சொல்லுபவரிடமும் கேட்டு வந்த மக்கள் நாம். ஆனால் பிறந்த குழந்தை நாட்டை ஆளும்! நாமம் போடும்! இதெல்லாம் குலத்தின் படி. --இது அறிவியலா?

அப்படி என்ன அறிவியல் செய்துள்ளது ஹிந்து மதம்? வாழும் முறை அறிவியலா? மனவியல் மூலம் ஒருவனை " நீ இதற்கெல்லாம் பயன்பட மாட்டாய். தூய்மை இல்லாதவன், உனக்குப் பிறக்கும் குழந்தையும் உன்னைப் போல் தான், உன்னைப் போலவே அவனும் பயன் பட மாட்டன், எனக்கு பணி செய்து காலம் கடத்து "சொல்லி அடிமைப் படுத்தும் முறையா? ----இதுவா?

கைம்பெண்களை மூலையில் கிடத்தி வாழ்வின் எந்த நல்லக் காட்சியையும் காண ஒட்டாமல் செய்து அவர்களை வாழும்போது நெருப்பில் இட்டு வதைப்பது மட்டும் இல்லாமல் , தெரிந்தோ தெரியாமலோ தங்கள் எதிரில் தென்பட்டால் எதோ பேயைக் கண்டது போலவும், அதை விடக் கீழானதைக் கண்டது போலவும் பேசி அவர்களை துரத்திய வாழ்வு-- அறிவியலா?

தன் வீட்டுப் பெண்கள் எங்கே தம்மை மிஞ்சி விடுவரோ என வீட்டின் அடுப்படியே அவர்களின் ராஜ்ஜியம் என வைத்ததும் அல்லாமல் அந்தப் பக்கமே போகாமல் இருந்து அந்தப் பெண்களையே தன் வீட்டாருக்கு செய்யும் பணியே, தன் வாழ்வின் லட்சியம் என்று நினைக்க வைத்த திறன்? அதிலும் ஓராயிரம் வகையில் இது செய், அது செய் என சொல்லி அடக்கி வைத்த நிலையோ?

அந்தப் பெண்களிலேயே பல வித பிரிவுகள் செய்து, அவர்களுக்கு இயற்கையிலேயே வரும் மாத விளக்கைக் கூட தீட்டு என்று சொல்லி வதைத்ததா? பெண்களுக்கு ஒய்வு கொடுக்கவே அந்த மாதிரி சொன்னோம் என்று சொன்னவர்கள் தங்கள் பெண்களிடம் அதைக் கூட புரிய வைக்க முயலாளது ஏன்?
கோவிலுக்கு அன்று சென்றால் எப்படி தீட்டு ஆகும்? கைம்பெண் வாழ்த்தக்கூடாது என சொல்லி அவளை
ஒரு அமங்கலமாக நோக்கச் செய்தது தான்---அறிவியலா?

கோவிலில் ஒரு சாரார் மட்டுமே இறையை தொட்டு வணங்கி மற்றவருக்கு இறைவனைக் கேட்டு அருள் பெற்றுத் தரும் , இறைவனுக்கும் மக்களுக்கும் ஒரு தரகராக ?, இதன் மூலம் தாங்களே கடவுளாகவும் உயர்ந்த ரகசியம்-- அறிவியலா?

கண்ணதாசனின் அர்த்தமுள்ள இந்து மதம் -என்றப் புத்தகத்தில் நிறைய பழக்கங்களை ஹிந்து மதத்தின் தத்துவங்களாக அணி செய்ய முயல்வார். அவருக்கே நிச்சயம் தெரியும் அதுவெல்லாம் ஹிந்து மதத் தத்துவங்கள் அல்ல, அந்த அந்தப் பகுதி மக்களின் பழக்கங்கள், (தீயவையும், நல்லவையும் கலந்தது)"

ஆனால் என்ன செய்வது? வேதத்தில் இருப்பதை சொன்னால் செருப்பால் அடிப்பார்கள்! எனவே மக்களின் வாழ்வியல் முறையே ஹிந்து மதம் என்று சொன்னால் ஹிந்து மதம் அறிவியல் பால் வந்து விடாதா என்ற ஒரு நப்பாசை தான்!

உலகில் இந்தியாவைத் தவிர ஹிந்து மதம் வேறு எங்கும் இருந்ததாக வரலாறு இல்லை. அங்கு வாழ்ந்த மக்கள் எல்லாம் என்ன இழிந்துப் போய்விட்டார்கள்? ஹிந்து மதமே அறிவியல் என்றால் உங்கள் சிந்தனையே அறிவியல் என்றால், நீங்கள் மனித குலத்திற்கு என்ன அறிவியல் கருத்துகளை சொல்லிச் சென்றீர்கள்?

கேவலம் சடங்கு, சம்பிரதாயங்கள், மடி, மேல், கீழ் என வார்த்தை ஜாலங்கள் செய்து மக்களை அடிமை செய்து வாழும் வாழ்வு அறிவியல் என்றால் அறிவியல் என்ன நீங்கள் உலரும் வார்த்தைகளின் தொகுப்பு என்ற நினைப்பா?

இன்னமும் எத்தனை காலம் தான் நீங்களும் மயங்கி, மக்களையும் மயக்கி வாழலாம் என்ற கனவு காண்கிறீர்கள்? உலகம் உருண்டை என்பதே தேறாமல் அதைப் பாயாக சுருட்டி மறைந்த மனிதர்களைப் பற்றியக் கதைகளின் தொகுப்பு தானே ஹிந்து மதம்!

ஹிந்து மதம் அறிவியல் என சொல்லும் அறிவாளிகள் தங்கள் வீட்டுப் பிள்ளைகளை ஆங்கிலக் கல்வி படிப்பதை நிறுத்தி விட்டு ஹிந்து மதத் தத்துவங்களைப் படிக்க வைத்து அதன் மூலம் இந்த சமூகத்தில் அறிவியல் சிந்தனை மேலும் வளர வகை செய்யுங்கள்.

ஏற்கெனவே கொஞ்சம், கொஞ்சம் மயங்கித் திரியும் மக்களுக்கு ஜோதிடம் என்னும் அறிவியல் கற்றுத் தருகிறேன் என இணைய வகுப்புகள் நடத்தி அடுத்த தலைமுறைக்கும், எல்லோருக்கும் அறிவியல் சிந்தனை பரப்புகிறார்களே!, நிறையப் பேர் வாருங்கள்! அரும்பணி ஆற்ற! நம் ஹிந்து மதம் வாழ!

N.S. கிருஷ்ணன்

2010-03-07T10:01:00.000-08:00

கலைஞர் தொலைக்காட்சியில் திரு. N.S. கிருஷ்ணன் அவர்களது வாழ்க்கை சம்பவங்கள் காட்டப் பட்டு வருவது எல்லோருக்கும் தெரியும்.

நிகழ்ச்சியில் காட்டப்படும் படத்தொகுப்பில் ஒரு படக்காட்சியில் முதல் தேதி படம்(1955) கீழ்க்கண்ட உரையாடல் இடம் பெறுகிறது:

இடம்: சமையல் அறை:
காட்சி: பணியாள் புகைப் பிடித்துக் கொண்டு இருக்கிறார் அங்கு n.s.k வருகிறார். கண்டதும் பணியாள் புகைப்பதை மறைக்கிறார். வாயில் இருக்கும் புகை அப்படியே வெளிவராமல் தங்கி விடுகிறது.

N.S.K: ரொம்ப நாளா வீட்டில் சீனி தீர்ந்துபோரதுக்கு நீ தான் காரணமா?
பணியாள்: இல்லீங்க!
பேசும்போது புகை எட்டிப் பார்க்கிறது

N.S.K வாயில இருந்து புகை வருது?
பணியாள்: பனிக்காலம். அதுதான் பேசும்போது வருது
N.S.K வெயில் காலம்னா சாம்பல் வருமா?
பணியாள்: !!
பணியாள் கையில் இருந்த சிகரெட் பார்த்து விடுகிறார்.
N.S.K என்ன இது சிகரெட் பிடிக்கிரியா? பிடிச்சா என்ன ஆகும் தெரியுமா? வாய் நாறும்! ஈரலக் கெடுக்கும். எழும்ப உருக்கும்! ஆயுளைக் குறைக்கும்! குடிக்கலாமா?

அடி கிடைக்கிறது!. தன் கையில் இருந்த சிகரெட் எடுத்துப் புகைக்கத் தொடங்குகிறார். பார்த்த
பணியாள் என்னங்க? என்னைக் குடிக்க வேணாம்னு சொல்லிட்டு நீங்க?

N.S.K ஏன்டா? சொல்றவன் அப்படியே நடப்பான்னு நினைக்கிறியா? மடையா! நான் மற்றவர்களுக்கு புத்தி சொல்ற வர்க்கம் சேர்ந்தவண்டா!

காட்சி மறைகிறது!

KAATCHI ( இங்கு சென்று இந்தக் காட்சி காணுங்கள் )

எத்தனையோ பாடம் சொல்லும் இந்தக் காட்சி!

சோதிடம் தனை இகல்! பத்து மாதப் பெண் குழந்தையை சோதிடம் காரணமாகக் கொன்ற தந்தை!

2010-03-05T11:35:00.000-08:00

சோதிடத்தை நம்பாதே! என காளியை நம்பும் பாரதி, விவேகானந்தர், ராமகிருஷ்ணர் மற்றும் நமது சைவப் பெரியோர் நால்வரும் சொல்லிச் சென்றனர்!

சோதிடத்தை நம்பாதே! என நாத்திகத் தலைவர்களும், பகுத்தறிவுப் பெரியோர்களும் சொல்லிக் கொண்டே இருக்கின்றனர்!

நம்மில் யார் கேட்டோம்? அவர் சொல்வதை!
நம்பாதீங்கனு சொன்னா, நீ என்ன கடவுளுக்கு எதிரியா? எனக் கேட்கிறார்கள்!
எங்களின் ஆறாவது அறிவைக் கொண்டு இறை அருளால் நாங்கள் உனது எதிர் காலத்தையும், அதில் ஏதாவது தீங்கு இருக்ந்தால் அதற்கான பரிகாரத்தையும் நீக்கி விடுவோம் என்று சொல்லி காசு பார்கின்றனர். இது மட்டும் இல்லாமல் மற்றவர்களுக்கு பாடமும் சொல்லித் தந்து வாத்தியார் பட்டம் பெறுகின்றனர்.
எங்கே நாம் சொல்வது பலிக்காதோ என பயந்து இருக்கும் எல்லாவிதக் கெட்டதுகளையும் சொல்லி நம்மை பயமுறுத்திவிட்டு பின்னர் அது நடக்கவிட்டால் நீங்கள் இறைவனை நம்பியது வீண் போக வில்லை எனக் கதை அளக்கின்றனர்.

இவ்வளவும் மறுபடி எதற்கு எழுதுகிறேன்?

காரணம்: பத்து மாதப் பெண் குழந்தையை சோதிடம் காரணமாகக் கொன்ற தந்தை!
மனிதன் இந்த மட்டில் தரம் தாழ்ந்துப் போகக் காரணம்?
அவனது மூட எண்ணம் இல்லாமல் வேறு என்ன?
அன்று கம்சன் அரக்கன்! இன்று இதைப் போல் எத்துணை பேர்?
இதற்கெல்லாம் காரணம் இந்த முட்டாள் தனமான சிந்தனையை நம்மிடம் பரப்பும் இந்த சோதிடர்கள் தான்!

இவர்களுக்கு துணை நிற்கும் இந்த மீடியாக்களை யார் கேட்பது?
நித்யானந்தர் விசயத்தில் மீடியா செய்யும் அநியாயத்தை கேள்வி கேட்கும் மனிதர்கள் கேவலம் பணத்துக்காக நமது சிந்தனைக் கெடச் செய்யும் இந்த ஜோதிட நிகழ்ச்சிகளை நடத்தும் மீடியாக்களை நோக்கி விமர்சனம் செய்யாததன் காரணம்?

தங்கள் பிழைப்பில் மண் விழுந்து விடும் என்பது அல்லாமல் வேறு என்ன?

விளக்கு வச்ச நேரத்தில!
கலைஞர் தொலைக்காட்சித் தொடரில் நன்கு படித்த சீட்டு நிறுவனம் நடத்தும் ஒரு தந்தை கேவலம் ஒரு ஜோதிடர் சொன்னதை நம்பி தன் மகள் திருமணத்தை நிறுத்திய அவலத்தை எங்கு சொல்ல?
இதைப் பார்க்கும் நம் போன்ற சாதாரண மக்கள் நிலை?

மானமுள்ள எந்த மனிதனும் நிச்சயம் ஒரு உறுதி எடுத்துக் கொள்ளவேண்டும். ஜோதிடத்தை எந்தக் காரணம் கொண்டும் நம்ப மாட்டேன் என!
முடியுமா உங்களால்?

என்னை ஏதாவது திட்டவேண்டும் என நினைத்தால் முதலில் பாரதி, விவேகானந்தர் உள்ளிட்ட மனிதர்களைத் திட்டி விட்டு பின்னர் என்னை திட்டுங்கள்.

நித்யம் ஆனந்தமாக!(2)

2010-03-04T04:03:00.000-08:00

நித்யம் ஆனந்தமாக இருக்க சொன்னவரை ஹரிதுவாரை நோக்கித் துரத்திய ஊடகங்களை
நோக்கி ஒரு கேள்வி? நீங்கள் நாளும் நாளும் நடத்தும் நிகழ்ச்சிகளில் எத்தனை எத்தனை கீழ்த்தரமான சிந்தனைகளை மக்களுக்குத் தருகிறீர்கள். உங்களைக் கேட்பார் யாரும் இல்லையா?

காவி கட்டி, அரசன் மனைவியுடன் கூடிய, ஆதி சங்கரர் வழியில்!
இன்னமும் வரலாற்றின் பக்கங்களில் தேடினால் தெரியும் துறவிகள் எப்போதும் துறவிகள் அல்ல என.

மக்கள் ஏன் இப்படி காவி கட்டிய மனிதர் பின்னால் போகிறார்கள்?
தங்களால் மனதாலும் நினைவாலும் சில நிமிடங்கள் கூட விட்டு விட முடியாத உறவுகளையும், உணர்வுகளையும் விட்டு விட்டு வாழும் இவர்கள் எத்தகைய மன உறுதி கொண்டவர்களாக இருக்க முடியும்? என நினைத்து இவர்கள் நிச்சயம் தங்களை விட மேலானவர் என முடிவு செய்து அவர் காட்டிய வழி செல்ல முனைகின்றனர்.

துறவியின் காலில் விழும் காரணமும் இதுதான். எப்போது ஒரு துறவி இந்த நிலையில் தவறி விழுகிறானோ அப்போதே அவன் வார்த்தை மதிப்பிழந்து விடுகிறது.
இதுவரை எந்த துறவி சொன்ன வாக்கும் புதியது அல்ல. ஆனால் ஒவ்வொரு சமூகத்திலும் அந்த அந்த காலங்களில் வேறு வேறு நிலையில் சிந்திக்கும் திறன் கொண்ட மனிதர்கள் கிடைக்கிறார்கள். அவர்களின் சிந்தனையே சமூகத்தை வழி நடத்தும். இதுவரை எந்த ஒரு துறவியும் சமூகத்தை சமூகத்தின் காரணம் தொட்டு வழி நடத்தி இருக்கிறாரா என்பது விடை சொல்ல முடியா கேள்வி.

சங்கர மடத்தின் அன்பு வழியில் ! சென்ற , நாம் அறியக் கிடைத்த நம்மை மேன்மைக்கு உள்ளாக்கிய நம் உள்ளக் கதவுகளை திறந்து வைத்த மாமணியை, நித்யம் ஆனந்தம் கொள்ளத்தக்க சிந்தனைகளை நமக்கு அள்ளித்தந்த மனிதரை நாம் துன்பமடையச் செய்யலாமா?

சில ஊடகங்கள் கேள்வி கேட்கின்றன. நித்யானந்தர் எப்போது சொன்னார் தான் துறவி என? அவரது படுக்கை அறையில் நுழைய நமக்கு என்ன உரிமை ?

நம் சமூகத்தில் எதுவும் சொல்லி புரியவேண்டியது இல்லை. காவி கட்டினால் அவர் துறவி இது தான் அவரது வடிவம். எப்போது ஒருவன் காவி கட்டினானோ அப்போது அவன் துறவி. இந்த பிம்பம் வைத்து இந்த சமூகத்தை வழி நடத்த முனைந்த மறுகணம் அவன் சிலக் கட்டுப்பாடுகளுக்கு உட்பட்டவன் ஆகிறான். அவற்றில் ஒன்று அவனது படுக்கை அறையும் திறந்த புத்தகம் எனக் காட்ட வேண்டியதும் ஒன்று.

சன் டிவி எதோ இப்போது தான் படுக்கை அறைக் காட்சியை நமது வீட்டு வரவேற்பறையில் முதல் முதலாக காட்டுவது போல் நம் பதிவர்கள் எழுதுவது வேடிக்கை. நாம் பார்க்கும் பெரும்பாலான நிகழ்ச்சிகள் இப்படித் தானே இருக்கின்றன. ராமாயணம், மகாபாரதம், விக்ரமாதித்தன் கதைகளில் இல்லாத
ஆபாசமா இவர்கள் காட்டி விட்டனர்?
கவிஞர்கள், எழுத்தாளர்கள் என சொல்லிக் கொள்ளும் எத்துணைப் பேர் தங்கள் படைப்புகளை ஆபாசத்தால் நிரப்பி அளிக்கின்றனர்? இவர்கள் சிந்தனை வரைமுறைக்கு உட்பட்டதல்ல எனும்போது?
சன் டிவி செய்த இந்தச் செயலால் எத்தனைப் பேரின் முகமூடிக் கிழிந்து அழுக்கும், நாற்றமும் வெளியாகிறது. இதற்கு நன்றி!

ஒன்று மட்டும் தெளிவு. வெளியாகும் ஒவ்வொரு செய்திக்கும் மதச் சார்ந்தும், அரசியல் சார்ந்தும் பார்க்கும் மனநிலை நம் மக்களை விட்டு நீங்கவில்லை என்பதற்கு நேற்று வெளி வந்தப் பதிவுகளும், அதன் பின்னூட்டங்களும் சான்று.

வேடிக்கை என்னவெனில் மதச் சார்புடையவர் நித்யானந்தர் செய்தது எந்த மனிதனும் செய்வது! அவர் படுக்கை அறையை அம்பலப் படுத்தியது சன் டிவி குற்றம் என பழி சுமத்தியது!

சாமியாரின் சேவை !

2010-03-01T06:37:00.000-08:00

மக்களின் நலனில் அக்கறை கொண்ட சாமி ஒருவர்(ஒருத்தன்), பன்னாட்டு விமான நிறுவனத்தை சேர்ந்த சிலருடன் சேர்ந்து நம் ஐந்து நட்சத்திர வாடிக்கையாளர்களுக்கு சேவை செய்து உள்ளார். இவர் செய்த சேவையின் மதிப்பு பல மில்லியன் பவுண்ட் ஆக இருக்கலாம். ஒரு சாமியார் தனது வியாபார திறன் மூலம் எத்தனை சேவை செய்துள்ளார் என்பதை நினைத்தால் பெருமை கொள்கிறோம்.

இவர் பெயர் ஷிவ் மீரா த்விவேதி . டெல்லியில் உள்ள ஒரு கோவிலை இதற்கான வரவேற்பு நிலையமாக பயன்படுத்தி உள்ளார். ஏறத்தாழ 200 பெண்கள். அவர்களில் விமானப் பணிப்பெண்கள், மாணவிகள் அடங்குவர். லட்சம் பேர் இவரது ஆன்மீக வழியை பின்பற்றுவதாக சொல்லப் படுகிறது.

இவரைப் போல சாமியார் சேவை இன்னமும் எங்கெங்கு நடைபெறுகிறதோ?
இவர்கள் தங்களை காத்துக் கொள்ள நமது நம்பிக்கை காரணமாய் இருப்பது வேடிக்கை !
மக்களே காவி கட்டியவனை எல்லாம் நம்புவதால் வரும் வினைகள்?

இவன் ஒரு நாளேனும் பொய்யாகவேனும் ஈசனை கும்பிட்டு இருக்க மாட்டானா?
ஐந்தறிவு ஜீவனுக்கெல்லாம் முக்தி கொடுத்து ஆட்கொண்ட ஈசன் இவனுக்கு புத்தி ஏதும் தரவில்லையா?
அல்லது இவனுக்கேனும் தெரியுமோ? ஈசன் இதை எல்லாம் வந்து கேட்க மாட்டார் என!

கணிணிக்கு ஏற்ற மொழி தமிழ்

2010-02-24T09:43:00.000-08:00

சில நாட்களுக்கு முன் தமிழ் இணையத்தில் பக்கங்கள் பார்த்திருந்தபோது கணிணிக்கு ஏற்ற மொழி தமிழ் என சொல்லி இருந்தது.

இதைப் பற்றி மேலும் தேடியபோது sanskrit மொழி கணினிக்கு ஏற்ற மொழி என ஆய்வு செய்துள்ளதாக யாரோ எழுதி இருந்தனர்.

இந்த இரு முடிவுகளும் எதை சொல்கின்றன என எனக்குப் புரியவில்லை. கணிணிக்கு என C மொழியும் அதைத்தொட்டு வேறு ஜாவா, html ஆகியனவும் இருப்பது அறிகிறேன். இவற்றில் எங்கு மனிதர் பேசும் மொழிகள் தமிழ், sanskrit வருகின்றன?

எனக்கு எதோ இவர்கள் சொல்வது புரியவில்லை என அறிகிறேன். யாராவது சொல்வீரா?

செம்மொழி தமிழ் அறிவியல் படைப்புகளைக் கொண்டு உள்ளதா? தற்போதைய அறிவியல் ஆராய்ச்சிக் கட்டுரைகள் கொண்டுள்ளதா? இல்லை என்பதே விடை.
இதை சரி செய்வது அவ்வளவு எளிது அல்ல. உலகின் பெரும்பாலான ஆராய்ச்சி இதழ்கள் english உள்ளிட்ட ஐரோப்பிய மொழிகளில் தான் உள்ளன. இவற்றை தமிழில் மொழி பெயர்ப்பது நிச்சயம் கால விரயம் என்று சொல்ல முடியாவிட்டாலும் அது தான் உண்மை.

தாய் மொழியில் படிக்கும் ஜப்பான், ஜெர்மனி, சீன மக்கள் அனைவரும் தங்கள் ஆராய்ச்சிக் கட்டுரைகள் ஆங்கிலத்தில் தான் வெளி இடுகின்றனர் .(பெரும்பாலும்)

ஆங்கில அறிவு இருந்தால், கற்கும் ஆர்வம் இருந்தால், தற்போதைய எந்த அறிவு இதழ்களையும் கற்று நம் அறிவை விரிவாக்கலாம். ஆனால் இந்த நிலை தமிழ் மட்டும் அறிந்த, கற்கும் ஆற்றல் உள்ளவருக்கு கிடைக்க நீண்ட காலம் ஆகும்.
புதிய கண்டுபிடிப்புகள் தமிழ் மூலம் வருவது கடினம். ஏனெனில் அதற்கென அடிப்படை அறிவு சொத்துகள் தமிழில் இல்லை. எந்த ஒரு புதிய அறிவியல் கலை சொல்லும் உலகின் எல்லோராலும் ஏற்கத்தக்க சொல்லாகவே இருக்க வேண்டியது அவசியம்.
அதனைத் தமிழ் செய்வது ஒரு புதிய கண்டுபிடிப்புக்கு ஈடு.

ஆனால் அறிவியலின் பலன் எல்லோரையும் சென்று அடைய அது வட்டார மொழிகளில் பயனாளி இயக்கும் வழியில் வேண்டும்.

விவசாயத்துக்கு வயலும், வாழ்வும் போல. வேளாண்மையில் நாள்தோறும் ஏற்படும் முன்னேற்றங்கள் தமிழில் இல்லாவிட்டாலும் ஒரு அறிஞர் அதன் பயனை தமிழில் சொன்னால் போதும்.

இதைப் போலவே எல்லா அறிவியல் துறை முன்னேற்றங்களையும் தமிழில் செய்தியாக வெளியிடலாம். இதற்கு நாம் கலைச்சொல் அகராதி உருவாக்க வேண்டியதில்லை.

விண்டோஸ்? டெஸ்க்டாப்? இப்படி மொழி பெயர்ப்பது சரியா?
html, C, php, இதை எல்லாம் எப்படி பெயர்ப்பது?

நாம் எல்லோரும் அறிந்த cos, sin, tan இவற்றை எப்படி பெயர்ப்பது?
விலங்கு, தாவர அறிவியல் வகைப்பாட்டியல் பெயர்களை?

ஒரு தனி மனிதனுக்கு வேண்டிய அறிவியல் அறிவு அவன் மொழியில் கிடைக்க முதலில் முயல்வோம். அவன் பயன் படுத்தும் சாதனங்களை முதலில் அவன் மொழியில் பயன் செய்யும் நிலை உருவாக்குவோம்.

புதிதாக உங்கள் துறைகளில் நீங்கள் உண்டாக்கும் மாற்றங்களை தமிழ் செய்ய முயலுங்கள்.அறிவியல் தவிர்த்த மற்ற கலை, ஆராய்ச்சிகளை தமிழில் பெயர்த்தல் சிரமமாக இராது. அதை முதலில் செய்வோம். நம் அடுத்த தலைமுறை அடிப்படை அறிவை சிரமம் இல்லாமல், வெட்கம் இல்லாமல் தமிழில் பெற முயல்வோம்.
ஆங்கிலத்தைத் திறனுடன் படித்து அறிவைப் பருக்கும் வண்ணம் பழக்குவோம்.

நெருப்பு நரி வாழ்விடம் -மொழி -நாடு

2010-02-20T04:21:00.000-08:00

நீண்ட நாட்களாக
நான் கூகிள் மூலம் நெருப்பு நரியில் தேடி ஒரு இணைய தளம் செல்லும்போது அந்த இணைய தளத்தின் மொழி நான் இருக்கும் நாட்டின் மொழியாகவே உள்ளது. உதாரணமாக ஒரு பிளாக்கர் பயனரின் profile இங்கிலீஷ் அல்லாத மொழியாகவே உள்ளது. எனது இணைய தொடர்பை வைத்து இந்த உலவிகள் நான் இருக்கும் பகுதி தொடர்பான மொழி கொண்ட இணைய தளம் தருவது என்னைப் போன்ற மொழி அறியாத மக்களுக்கு மிக்க துன்பம்.

இதை எப்படி சரி செய்வது என நான் பல இடங்களில் தேடி செய்த பரிகாரங்களும் பலனளிக்கவில்லை,

முதலில் கணிணி control panel சென்று உங்கள் மொழி, நாடு மாற்றுங்கள் என்று ஒருவர் சொன்னார். செய்தேன் பலன் இல்லை,

google chrome இதைப் போல் geoposition கொள்வது இல்லை என ஒரு நண்பர் சொன்னார். அங்கேயும் இதே தொல்லை,

நெருப்பு நரியில் தேடி அவர்கள்(mozilla) இணையத்தில் கொடுத்த செய்திபடி about:config சென்று சில மாற்றம் செய்தேன். பயன் இல்லை.

நான் விரும்பும் இணைய தளம் ஆங்கிலத்தில் இருந்தாலும் இவை வேற்று மொழியில் வருவதை எப்படி தடை செய்வது என என்னால் அறிய முடியவில்லை.

இதனை எப்படி சரி செய்வது என யாராவது சொல்லுங்கள்.

இதில் வேடிக்கை என்னவென்றால் நெருப்பு நரி இப்படி தளத்தை மாற்றிக் கொடுத்தது அல்லாமல் இது வேறு மொழி ஆங்கிலத்தில் மொழி பெயர்ப்பு செய்து இந்த தளம் காண்பிக்கவா ? என கேட்கிறது. என்ன பதில் சொல்ல?

சாதிகள் நம் அடையாளங்கள் !

2010-02-13T04:51:00.000-08:00

இந்தியாவின் வட மாநிலங்களில் எல்லோரது பேரிலும் எதோ ஒன்று ஒட்டி இருக்கும்.
அது சாதிப் பெயராக இருக்கும் அவசியம் இல்லை. ஆனால் அதன் மூலம் அவரது சாதி அறிதல் எளிது. இந்த ஓட்டுப் பெயர் மூலமே பொது இடங்களில் அவர் அறியப் படுகிறார். ஆனால் மிக நெருக்கமானவர்களுக்கு அவர் பேர் அவர் அப்பா வைத்த பெயர் தான்.

பெரியார் போன்ற அரிய தலைவர்களின் முயற்சியால் நம் பெயரில் ஒட்டிய சாதிகள் நம்மை விட்டு விலகி ஓடின. பாரதி, வ.வு.சி இவர்கள் தங்களை தங்கள் சாதிப் பெயர்களிலேயே அழைத்து வந்துள்ளனர். அப்போதைய வழக்கம் அப்படி. அவர்கள் சாதிக்காக கொடி தூக்கினர் என்று சொல்ல முடியாது? பெரியாரை நாயக்கர் என்று அளித்த சமூகம் நமது.

ஆனால் காமராஜ் , சிவாஜி , கருணாநிதி இவர்கள் பெயர்கள் பின்னால் சாதி சேர்த்து பாருங்கள். எவ்வளவு கீழாக இருக்கும் எனத் தெரியும். என் பெயரின் sur name என் தந்தை பெயர், என் தாயின் பெயர், என் ஊரின் பெயர் இப்படி ஏதாவது இருந்தால் என்ன குற்றம்?
ஆனால் இதில் என் சாதியை நான் இப்போது சேர்த்தேன் என்றால் ?

இன்று நான் சந்திக்கும் பெரும்பாலான மக்கள் தாங்கள் இந்த சாதி என்று பெருமை கொள்வது இல்லை. ஒரு வேளை என்னுடன் இந்த சாதி ஒட்டி இருந்து இருந்தால் என்னை மற்றவர் நடத்தும் வகை ? நான் மற்றவரை நோக்கும் நிலை?

எதோ எங்கோ ஒரு மன மூலையில் பதுங்கி இருக்கும் இந்த சாதி பற்று நம்மை விட்டு நீங்க அதன் அடையாளங்களை நாம் நீக்க வேண்டும் நிச்சயமாக. பூநூல் அறுத்ததும் இதனைத் தொட்டே!

நம் தமிழ் மக்கள் தங்கள் பெயரில் நீக்கிய சாதியை சமூகத்தில் இருந்து நீக்கினால் எங்கு தம் தலைமையும், தனி தன்மையும் போய்விடுமோ என்ற அச்சத்தில் அவ்வபோது சில தலைகள் சாதிப் பெயரின் பெருமையை தலை தூக்கி விட முயல்கிறது.

சங்கங்கள் சார்பில் கட்சிகளை உருவாக்கி பிரிவு செய்யும் கயமை எண்ணம் கொண்டவரை நாம் விலக்குவோம்.

சாதி சங்கங்கள் இல்லாது ஒரு சமூகம் நம் பிள்ளைகள் காலத்திலேனும் உருவாக்குவோம். நம் சாதி அடையாளங்கள் நம் பிள்ளைகளை அடையாமல் காப்போம்.

பிறப்பொக்கும் எல்லா உயிர்க்கும்!
பிறப்பின் வழி வரும் இந்த அடையாளங்களை அறவே ஒழிப்போம்!

நீ இன்ன சாதி! என்பதை நீ! தான் நிச்சயம் செய்ய வேண்டும் உன் தந்தை அல்ல!

விளக்கு வச்ச நேரம் --2

2010-01-29T05:34:00.000-08:00

அன்பு வாசகர்கள் எதிர்பார்த்ததுபோல நம் விளக்கு வச்ச நேரத்.... கதை தலைவி , ஜோதிடர் கணித்தது போல் காத்திருந்த நல்ல பாம்புவினால் கடிபட்டார். இவர் கதைத் தலைவி என்பதன் காரணமாக நம் வாசகர்கள் எண்ணியது போல் காப்பாற்றப் படுகிறார்.

நல்ல வேளை இவர் ஜோதிடத்தை நம்புவது போல் மிக அழுத்தமாக காட்ட வில்லை.
அம்மாவின் மூட நம்பிக்கையில் இருந்து தப்பிக்க இவர் படும் பாடு மிக அழகாக காட்டப் பட்டுள்ளது. மூட நம்பிக்கையில் மூழ்கிவிட்ட இவரது அம்மாவினைப் பார்த்தேனும் நம் மக்கள் இத்தகைய எண்ணங்கள் இல்லாமல் இருப்பார்களா?

பெண், பாம்பு கடிக்கவில்லை! என்று கூறியும் நம்பாத தாய் ! தன் மகளை மட்டும் கால் கழுவ சொல்லும் சுயநலம். இந்த காலத்திலும் சனி வந்து காலில் அமரும் என்ற மூடத்தனம்.

ஒரு நம்பிக்கை மட்டும் தானே என்று நம்பத் தொடங்கினால் காணும் எல்லா மூட எண்ணங்களும் நம்மை சூழும் என்பதற்கு நல்ல காட்டு இந்த அம்மா.

இதன் பின் நமது சிறப்பு ஜோதிடர் இந்த பெண்ணை பாம்பு கடித்து இருந்திருந்தால் இந்த பெண் இரு தார மணம் செய்வது மட்டும் இன்றி ஒரே நேரத்தில் இருவரோடும் ஒரே வீட்டில் வாழ்வார் என்று கணித்துக் கூறும் திறன் வியக்கத்தக்கது.

இந்த பாடத்தை இவர் எங்கு கற்றாரோ?
இந்த வகையான செயல்திறன்மிக்க ஜோதிடர் இன்னும் நிறைய பேர் வேண்டும்!
நம் அரசு இரு தார மணம் சட்ட விரோதம் என சொல்லி இருப்பது இவருக்கு தெரியுமோ?

ராமாயணம் போன்ற பழங்கதைகள் இந்த நிகழ்வுகளை கொண்டு இருந்து அதைக் காட்டினால் நாம் இந்த அளவு அதைப் பற்றி சிந்திப்பது இல்லை. ஏனெனில் எல்லாம் பழங்கதை தானே! நம் பிள்ளைகள் கூட நம்பாது! ஆனால் நம் தாய்குலம் நம்பும்!

ஆனால் ஒரு சமூகக் கதையில் வீட்டில் வேளை கழிக்கும் பெண்களை தன் தொடர் பக்கம் இழுக்க இவர்கள் செய்யும் கீழ்மைக்கு என்ன முடிவு?

இவர்கள் தான் சிந்தனையாளர்களா?

விளக்கு வச்ச நேரத்திலே

2010-01-25T11:45:00.000-08:00

நம் கலைஞர் தொலைக்காட்சியின் புதிய மக்கள் தொடர். பார்த்தவர்களை அறிவு வெளியில் முன்னேற்றும் தொடர்.
நமது பரந்த அறிவை மேம்படுத்தும் தொடர்.

ஜோதிடம் என்ற நமது அறிவுக்கு எட்டாத ஒன்றை சொல்லி அதனை எல்லோரும் பார்க்க வலியுறுத்தி வருவது.

நல்ல புகழ் பெற்ற ஜோதிடர் உங்களுக்கு என்ன எந்த நேரத்தில் நடக்கும் என்பதை நிச்சயம் சொல்வார் என முன் நிற்பது.

இதை எல்லாம் நம் மக்கள் எங்கே நம்பி விடாமல் போய் விடுவார்களோ என்ற சந்தேகம் தீரவும், நம்மை மேலும் அதனை நம்ப செய்யவும், நம் மனதில் எழும் கேள்விகளை இவர்களே எழுப்பி நம் கேள்விகள் தவறு என்று மிக அழகாக வெளிப்படுத்துகிறார்கள்.

"ஜோதிடம் தவறு" என்று சொல்வதாக இவர்களே காட்சி படுத்தி அப்படி சொன்னவர் ஜோதிடத்தை நம்பாததால் அடைந்த துன்பத்தை நமக்கு எடுத்து சொல்லி
நம் அறிவுக் கண்ணை திறந்து வைக்கின்றனர்.

இதில் வரும் முக்கிய காட்சியே " இளம்பெண் ஒருவர் ஜோதிடர் சொன்னது போல் பௌர்ணமிக்குள் பாம்பால் கடிபடுவதே." ஆனால் காட்சிப்படி இந்த பெண் ஜோதிடம் நம்பாதவர். ஆனால் இவரைப் பாம்பு கடித்து விடுகிறது. இப்போது இவர் ஜோதிடம் நம்புகிறாரோ இல்லையோ நம் மக்கள் நிச்சயம் நம்பி விட்டனர்.

ஆபாசம் கூட நம் அறிவை அந்த நேரம் மட்டுமே மழுங்க செய்யும். ஆனால் இவர்கள் பரப்பும் இத்தகைய பொய்மைகள் நம் சமுதாயத்தை அடி பணிந்து வாழ செய்து நம்மை நாசம் செய்யும்.

கடவுள் இருக்கிறாரா இல்லையா என்பது வேறு விஷயம். ஆனால் நம் எதிர்காலத்தைக் கண்டுபிடித்து சொல்லும் இந்த ஜோதிடர்களை நாம் நம்பி வாழமுடியுமா?

ஏன் இவர்களே தாம் சொல்வது சரி என்று காட்ட ஏதாவது தவறான செயல்களை செய்யக் கூடாது?

வாழ்வது ஒரு முறை! பயம் இல்லாமல் வாழப் பழகுவோம்!

மக்களின் நண்பன்

2009-11-03T04:01:00.000-08:00

சென்னை TIDEL PARK மக்களும், தரமணி,கானகம் சேர்ந்த பகுதியில் வாழ்மக்களும் பலகாலம் பயன்படுத்தி வந்த பாலம் உடைந்தது.

மரப்பாலம் போல் எதோ ஒன்று இந்த பக்கிம்காம் கால்வாயில் இருந்ததாகவும் கயிற்றில் நடக்கும் கழைக்கூத்தாடி போல் செல்ல வேண்டும் என்பதாகவும் அறிந்து இருக்கிறேன்.

நாங்கள் சிறு வயதாக இருக்கும்போது இரும்பு மூலம் கட்டப்பட்ட இந்த பாலம் நடப்பவர்களுக்கும், மிதிவண்டிகாரர்களுக்கும் உருவாக்கப்பட்டது. பாலத்தின் நடுவில் கம்பங்கள் நட்டு இதை நடைமுறைப் படுத்தினர். பின்னர் நம் மக்கள் கம்பங்களை உடைத்ததன் மூலம் பைக், ஆடோ செல்ல வழி செய்தனர். நம் TIDEL பார்க் நண்பர்கள் மற்றும் படித்த பெருங்குடி மக்கள் தங்கள் காரினையும் ஒட்டி சாகசம் செய்தனர்.

ஞாயிறு இரவு பாலம் பற்றி தெரியாத யாரோ ஒரு லாரி ஓட்டுனர் வண்டி முழுதும் செங்கல் ஏற்றி வந்து இந்த பாலத்தைக் கடக்க முயன்று தோற்று பாலத்தை வெற்றிகரமாக உடைத்து மக்களின் நீண்ட கால நண்பனை கால்வாயில் நீராட்டினார்.

என்னத்தை சொல்ல?

2009-11-02T04:19:00.000-08:00

சமீபத்தில் தமிழிஷ் வரதக்ஷணை என்ற சமூகத்தின் புண்ணை நீக்கும் முயற்சியில் வரதக்ஷணை கொடுக்க மாட்டோம்/ வாங்க மாட்டோம் என்று வெளிப்படையாக சொல்லும் திறன் உள்ளவர்களை நாங்கள் பட்டியல் இடுகிறோம் என்று களம் இறங்கி உள்ளது.

பெரும்பாலும் உங்கள் உண்மைப் பெயர் கூட வெளியிடத் தேவையில்லை இங்கு.

இதுவரை எத்துணை பேர் தங்கள் பெயர்களை இணைத்து உள்ளனர் இங்கு?
ஒரு பெண்ணாவது தான் வரதக்ஷணை கொடுக்க மாட்டேன் என்று முன் வரிசைக்கு வருவாரா? சொல்லி விட்டால் எங்கே தனக்கு கிடைக்க வேண்டிய சரியான மணமகன் இந்த ஒரு காரணம் பற்றி கிடைக்காமல் போய் விடுமோ என்ற பயமா? அல்லது சமூகம் தன்னை எப்படி எண்ணும் என்ற காரணமா?

ஆண்கள் எத்துணை? தமிழிஷ் வலைத்தளம் பார்க்கும் அத்தனை பெரும் திருமணம் ஆனவரா? பட்டியலில் பெயர் சேர்ந்தால் மட்டும் நாம் வாங்காமலோ கொடுக்காமலோ இருந்து விடுவோமோ?

சாதி கல்வியில் நுழைகிறது என்று கூப்பாடு போடும் பதிவர்கள் திருமணம் என்ற இருமனம் முக்கியத்துவம் பெற்ற உறவில் இத்துணை வகைப் பட்ட சமூகக் கேடுகள் உள்ளதைக் கண்டும் காணாமல் போவது ஏன்?

கல்வி பொது சொத்து. அது பங்கிடப் படாமல் ஒரு குறிப்பிட்ட சமூகத்தினற்கே வேண்டும் ?
திருமணம் தன் குடும்ப விஷயம். இங்கு சாதி பார்ப்போம்; பணம் வர்கம் பார்ப்போம்; பணம் இருந்தால் வேறு எதையும் பார்க்க மாட்டோம்?

intercaste என குறிப்பிட்ட ஒரு மணப்பெண்ணின் தந்தை கூறுகிறார். நான் நாயுடு; மனைவி பிராமணன்; எங்கள் பெண்ணை ஒரு பிராமணப் பெண்ணாக வளர்த்து உள்ளோம். எனவே எங்களுக்கு பிராமண மணமகனே வேண்டும்!

சாதி எப்படி ஊடுருவி உள்ளது? இதையும் தாண்டிப் பாயும் பணம். ஒருவேளை ஏதாவது பணம் படைத்த மணமகன் கிடைத்தால் இந்த நிபந்தனை தளர வாய்ப்புண்டு?

சமூகத்தில் எல்லோரும் பணம் படைத்தவராக இருக்க முடியாது. ஆனால் எல்லோரும் நிச்சயமாக மனிதர்களாக வாழமுடியும். இது எப்போது புரியும்?

எழையாக உள்ள உயர் சாதி மனிதன் பணம் பெற்று விட்டால் நிச்சயம் சமூக அந்தஸ்து கிடைத்து விடும்! ஆனால் பணக்கார தாழ் சாதிக்கு? சமூகத்தில் யாரேனும் ஒருவன் வேறு எந்த காரணமும் இல்லாமல் இந்த சாதி என்ற காரணத்திற்காக அவமானம் அடைவது மனித நாகரிகமா?

பணம் இல்லாத காரணத்தால் திருமணம் சில காலம் தடைபடலாம். ஜாதகம் சாதி சரியில்லாமல் திருமணம் தடைப்பட்ட பெண்களின் நிலை?

நட்பு சின்னங்கள் !

2009-10-28T10:09:00.000-07:00

பிறந்தது முதல் நம் வளர்ச்சியுடன் நமது நண்பர்களின் எண்ணிக்கையும் வளர்ந்து கொண்டே இருக்கிறது. சிறு பிள்ளைகளாக தெருவில் சுற்றி திரியும்போது நமக்கு கிடைக்கும் நண்பர்களை நமது பெற்றோர் கண்காணித்து அவர் தகுதிக்கு ஏற்றது போல் நம் நட்பை மாற்றுகின்றனர். இருப்பினும் நாம் விடுவதில்லை.

பின்னர் பள்ளியில் நம் பக்கத்தில் உட்கார்ந்தவனை மிகவும் நேசிக்க கற்றுகொள்கிறோம். அவனும் எப்போதும் நம்முடனே சுற்றி வருவான் பள்ளி முழுதும்.
பள்ளி நட்பு பெரும்பாலும் இருவகை நன்றாக படிப்பவனை சுற்றி, அல்லது நல்ல செலவு செய்பவனை சுற்றி.

விளையாடும்போது ஒரு வகையான நட்பு. பின்னர் வீடு நோக்கி செல்லும்போது ஒன்று. வீட்டின் அருகில் ஒன்று. பின் உயர்நிலை பள்ளி மாறும்போது நம்மை சுற்றி இருந்த நட்பு வட்டம் களைந்து புதிய நட்பு வட்டம் உண்டாகும். பழைய நட்பு விட்ட சின்னங்களாக நம் உடலில் எங்காவது தலும்பாகவும், மனதில் ஒரு மலர்ச்சியாகவும்.

உயர் பள்ளியில் மீண்டும் கிடைத்த நட்பு பள்ளி இறுதி வரை கூட வரும். இங்கேதான் நமது வாழ்நாள் நட்புக்கான தகுதிவுடைய நண்பர்களும் கிடைக்கின்றனர். இவர்கள் எந்த காலத்திலும் நம் நினைவில் நிற்பார்கள்.

கல்லூரி காலம் எல்லோரும் சொல்வது போல் எல்லாருக்கும் மகிழ்ச்சியை மட்டும் அளித்து விடுவதில்லை. ஒவ்வொரு பழக்கம் கற்றுத்தரவும் ஒவ்வொரு நட்பு வட்டம் உருவாகும். உயர்ந்த சிந்தனைகளை பகிர்ந்து கொள்ள ஒரு வட்டம், நமது மன விகாரங்களை வெளிக்காட்ட ஒரு வட்டம். வாழ்வின் லட்சிய முழக்கங்களை செவி மடுக்க ஒரு வட்டம். நம்மில் உள்ள அனைவரும் கொண்ட எந்த ஒரு பழக்கமும் நமது நட்பு வட்டத்தை பொறுத்தது.

இந்த மூன்று பருவத்தின் இறுதியில் பார்த்தால் நம் மன ஆழத்தில் ஒரு மகிழ்ச்சியை பூரிப்பை கொடுத்த நட்பு விரல் விட்டு எண்ணி விடலாம். இந்த நண்பர்களை நம் வாழ்வின் இறுதி வரை கொண்டு செல்லும் துணையாக கொள்ளலாம். இவர்கள் நமது மனதில் உண்டாக்கிய பதிவுகள் எளிதில் மறக்க கூடியதாக இருப்பதே இல்லை.

நமது நண்பர்களில் எத்தனை பேர் தங்கள் வாழ்வின் பாதையில் வெற்றி பெற்று இருப்பார்கள்? அவர்களின் தோல்விக்கு காரணம்? ஒரு வேளை நம்மால் அவர்களுக்கு உதவ முடியுமானால் தயங்காமல் உதவுவோம்.

கோவில்களில் தீபம் அணைந்தது : பெண்களுக்கு ஆபத்து என வதந்தி

2009-10-27T01:26:00.000-07:00

என்னங்க? சேதி தெரியுமா?
தமிழ்நாட்டின் பல கோவில்களில் அணையா விளக்குகள் அணைந்தனவாம்!
சாயாக் கொடி மரங்கள் சாய்ந்தனவாம்!

வீட்டின் பெண்களுக்கு இதனால் மிகுந்த துன்பம் ஏற்படும் என செய்தி ஊர்(நாடு) முழுவதும் பரவியது. பயந்த நம் மக்கள் வீட்டின் வாசலில் விளக்கு ஏற்றி பெருமானே! எங்கள் வாழ்வைக் காப்பாற்று என பிரார்த்தனை செய்தனர்.

கோயில்களை இடியுங்கள் என்று வேண்டிய பெரியார் வாழ்ந்த நாட்டு மக்களின் அறியாமைக்கு அளவே இல்லையா?

இவை எல்லாம் நிச்சயம் நமது அறியாமையை, மூடத் தனத்தை வெளிச்சம் போட்டு காட்டுகின்றன.

பாப்போம்! இன்னும் எவ்வளவு காலம் என!

தோசை சுடுவது எப்படி?

2009-10-26T05:32:00.000-07:00

இன்னைக்கு எனது நண்பர்களை சாப்பிட அழைத்தேன். அவர்களும் வந்தனர். ஆனால் வந்தவர்களில் சிலர் இதுவரை தோசை என்றால் என்னவென்றே தெரியாதவர்கள்.
நான் பெரும்பாலும் யாரையாவது சாப்பிட கூப்பிட்டால் தோசை சுடுவதே பழக்கம்.
(இதுதானே மிக எளிது?)

இவர்கள் தோசை என்பது ரைஸ் கேக் என்ற வகையில் அறிந்தவர்கள். எனக்கு இதில் உடன்பாடு இல்லை. pizza, burger, போன்ற அவர்களது உணவுக்கு அவர்கள் ஊர் பெயரையே பயன்படுத்தும் நாமே நமது உணவை அவர்கள் உணவின் பெயரோடு பொருத்தி அதே பெயரிலேயே சுட்டி வருகிறோம்.

இட்லி, தோசை முதலியற்றை செய்வது எளிதாக தோன்றினாலும் ஒரு குறிப்பிட்ட சுவையுடன் செய்வது மிக கடினமே.

முதல் தோசை வருவது போல் இரண்டாவது வருவதில்லை. ஒவ்வொரு நாளும் வேறு வேறு என்பது போல ஒவ்வொரு தோசையும் வேறு வேறு.

இந்த குழுவில் ஒரு நண்பர் தான் தோசை சுட வேண்டும் என்று என்னிடம் இருந்த தோசை மாவை வாங்கி தோசை தட்டில் ஊற்றி தடவினால் அது வட்டம் என்று இல்லாமல் பல பல சிறு சிறு திவலைகளாக தோசை சட்டியில் உருவம் பெற்றன.
இப்போது அவர் முகம் பார்க்கவே மிக பரிதாபமாக இருந்தது. இருப்பினும் அவற்றை எடுத்து போட்டு விட்டு அடுத்த தோசை நான் ஊற்றினேன். வடிவம் சரியாக வந்ததும் அவருக்கு ஒரே ஆச்சரியம் நான் நிலவை தொட்டு விட்டேன் என்பதாக!

இன்னொரு நண்பர் தனக்கு pizza போல் topping ஏதாவது செய்யுங்கள் என்றார். அவரிடமே என்ன காய்கறி பிடிக்கும் எனக் கேட்டு மாவு சற்று கனமாக ஊற்றி சூட்டை சிறிது குறைத்து மேலே அரிந்த சிறு துண்டுகளை சேர்த்து சற்று எண்ணை விட்டு அவரிடம் கொடுத்து அடுத்தது ஊற்றும் முன் அது காணாமல் போனது.

இது சரிபடாது! இப்படியே சாப்பிட்டால் யார் வயிறு நிறைந்தது என்று தெரியாது என்று நினைத்துக் கொண்டு வரிசை முறை உண்டாக்கி தோசை சுட ஆரம்பித்தேன்.

மாவு எல்லாம் தீர்ந்ததும் தான் அவர்கள் சாப்பிட்ட உணர்வு பெற்றனர். பிடித்ததா என்று கேட்டேன்! மிக நன்று என விடை பெற்றனர்.

என்ன தோசை நல்லா இருந்துச்சா?

உங்கள் நாட்கள் எண்ணப் படுகின்றன(மறு பதிப்பு)!

2009-10-24T04:36:00.000-07:00

நாம் எல்லோரும் பிறந்தவுடனே நம் பயணம் இறப்பை நோக்கித்தான் என்பதை நம்மை பெற்ற தாயும் அறிவாள்! பிணம் சுற்றி அழும் கூட்டமும் அறியும் இனி இவர் எழ மாட்டார் என்று!

வாழ்வின் எதார்த்தம் பளிச்சென தெரிந்தும் நாம் ஏன் ஒருவரை ஒருவர் ஏளனத்தோடு, ஒரு வித கர்வத்தோடு பார்க்கிறோம்? நாம் தான் எல்லாம் அறிந்தவர், நமக்கு தான் எல்லாம் உரிமை என்ற சிந்தனை எப்படி தோன்றியது?

நாம் பிள்ளைகளாய் இருந்தபோது இருந்த நேர்மை எங்கே? நேர்மை புதிதாக கற்பிக்கப் பட்டதா?

இல்லையே! குழந்தைகளிடம் பாருங்கள் அவர்கள் நேர்மை மிக இயல்பானதாக இருப்பது தெரியும்! ஒவ்வொரு முறை குழந்தையை பார்க்கும்போதும் புதிதாய் பூத்த மலர் போல் என்ன ஒரு மலர்ச்சி அதன் கண்களில்! என்று வியப்பேன். இந்த மலர்ச்சி ஏன் நம்மை விட்டு போனது? நான் அறிந்தவன் என்ற கர்வம் காரணமா?

Photo taken from tarjet,bangaladesh

ஜாதி, மதம் எப்படி நம்மை பிடித்துக் கொண்டது? எப்படி என் ஜாதிக்காரன் மீது மட்டும் எனக்கு அளவு கடந்த நம்பிக்கை? இவர்கள் நம்மை நம் சாவில் இருந்து காப்பாற்றுவார்களா?

புதிதாய் பார்க்கும் யாரிடமும் அவர் என்ன சாதியாய் இருப்பார் என்று அறிந்துகொள்ள துடிக்கும் காரணம் என்ன? நம் ஆளுமை காட்டவா? அல்லது நம் அடிமைத்தனத்தை வெளிப்படுத்தவா?

கோயில் பூசாரியை சாமி! சாமி! என்று அழைப்பதன் நோக்கம் என்ன? அவர் நம் கடவுளிடம் சொல்லி நம் வாழ்நாளை நீட்டிப்பார் என்பதற்கா?

ஜோதிடம் இன்று நம் எல்லோரையும் ஆட்டி வைக்கும் முக்கிய காரணி ஆனதற்கு காரணம் என்ன? யோகம் என் ஜாதகத்தில் இருக்கிறதா என்று ஒவ்வொரு ஜோதிடன் இடத்திலும் கேட்டு கேட்டு அலுப்பது எதற்கு? எல்லாம் அறிந்த ஏகாம்பரம் போல் இந்த ஜோதிடர்கள் தாமே கடவுள் என்பதாக சொல்லும் கதைகளுக்கு காரணம் என்ன? என் ஜாதகத்தை கொடுத்தால் இவர்கள் சொல்லும் பரிகாரம் செய்தே என் சொத்து அழிந்து விடும் என்று தெரிந்தும் நாய் போல் இவர் பின்னால் சுற்றுவது ஏன்?

தெருவெங்கும் பிள்ளையார் கோயில்கள் பலபல பெயர்களில் இருப்பது ஏன்?
ஊர் தோறும் புது புது சாமியார்கள் உதிப்பதும் அவர்கள் லிங்கம் முதல் பலபல பொருட்களை மந்திரம் மூலம் கொண்டு வருவதும்?

திருவண்ணாமலை முதல் கொண்டு புது புது கோயில்கள், புது புது வழிபாடுகள்!
விதம் விதமான நேர்த்திகடன்கள்! அது என்ன இந்திய மக்களாகிய நமக்கு மட்டுமே
இந்த கடவுள்கள் பரிகாரம் செய்ய சொல்லி வலியுறுத்துகின்றன?

இந்த முட்டாள் தனத்திற்கு எல்லாம் அடிப்படை காரணம் ? நம் எதிர்காலத்தின் மீது நமக்கு இருக்கும் பயம்? நாம் கற்ற கல்வி நமக்கு நம் மீது நம்பிக்கை வளர்க்காததா? நம்மை எப்போதும் ஒரு மயக்கத்திலே வைத்திருக்கும் இந்த மாயங்களை விட்டு எப்போது வெளி வருவோம்?

மீண்டும் மீண்டும் நாம் ஏன் நமக்கு தெரியாத ஒன்றின் மீது அளவு கடந்த பயம் கொண்டு அதைப் பற்றி எல்லாம் தெரிந்தவர் போல் பேசும் வீணர்களை கேட்டு வாழ்கின்றோம்?
ஆன்மிகப் பெரியோர்கள் எல்லோருமே சொல்லி சென்றனர் " உண்மை அடியாரை கோள் என்ன செய்யும் என". கோளறு பதிகமே பாடி சென்ற சமூகம் நமது. நம்மில் எத்துணை பேர் நாம் கற்ற கல்வி வழி சிந்தனை செய்து நம் செயல்களை நிறைவேற்றுகிறோம்?

வாழ்வது சில காலம்! வாழ்வும் தாழ்வும் நம் கையில்! வாழ்வோம் எப்போதும் புதிதாய் பிறந்தவர் போல்!

விபசாரம் சரியா?

2009-10-18T09:05:00.000-07:00

நாம் இந்த உலகில் நம்மை சுற்றி பலவகையான மக்கள் பலவேறுபட்ட அனுபவங்கள் பெற்று வாழ்கிறோம்.

நமது அனைவரின் அடிப்படை சிந்தனை எப்படி என் சந்ததி சந்தோசமாக எதிர்காலத்தில் வாழும் என்பது தான். ஆனால் இதற்கும் மேல் தான் எப்படி மகிழ்வோடு இருப்பது என்பது தான்.

ஆணாகட்டும், பெண்ணாகட்டும் ஒரு கட்டத்தில் உடல் இச்சை ஒரு தேவையான மகிழ்வினை அளிக்கும் கருவியாக அமைகிறது.

என்னதான் இயற்கை உயிர் வளர்ச்சிக்காக இந்த இனபெருக்க செயபாட்டை உயிர்களுக்கு தந்திருந்தாலும் மனிதன் தனது மகிழ்வுக்கான ஒரு கருவியாக தான் வேண்டியபோது அடையும் வகையில் இந்த உடல் இச்சையை எண்ணுகிறான்.

ஆனால் நம்மில் எத்துணை பேர் நம் துணையை விட வேறு ஒருவரை எண்ணி நம் உடல் இச்சை பற்றி சிந்திக்கிறோம்?

இந்த காலத்தில் கல்வி தான் ஒரு மனிதனை சமூகத்தில்(அவனிடம் போதுமான பணம் இல்லாவிட்டால்) அங்கீகாரம் பெற்று வாழ செய்யும் கருவியாக உள்ளது.

ஆனால் இந்த கல்வி பெற மனிதன் தனது வாழ்வின் குறிப்பிட்ட இளமை காலத்தை வீணடிக்கிறான். இந்த காலங்களில் அவன் தான் கண்ணுருகிற எதிர் பாலினங்களை எல்லாம் மோகிக்கிறான்(மனதளவில்).

கனவு நாயகி என்று திரை நாயகிகளும் அழைக்கப்பட இதுவும் முக்கிய காரணமாகிறது.

மனதளவில் இன்றி சற்று திறன்? துணிவு? உள்ள சில மனிதர்கள் திருமணம் செய்யும் முன் இந்த அனுபவம் பெற விலை மகளிரை நாடுகின்றனர். ( விலை மகளிரின் தேவை?)

திருமணம் செய்த சிலர் ஒரு மாற்றத்திற்காக விலை மகளிரை நாடுகின்றனர்.
நம் மனித இயல்பே இருப்பதை விட்டு இல்லாததை தேடுவது தானே?

திருவருட்செல்வர் படத்தில் சிவாஜி கணேசன் மன்னராக நடித்த முதல் காட்சியில் நாட்டியம் ஆடிய பத்மினியை அழைப்பார். உங்கள் மனைவியிடம் இல்லாதது என்னிடம் எது உள்ளது? என் பெண்மைக்கு ஒரு மன்னன் களங்கம் விளைக்கலாமா என்று பத்மினி கேட்பார்?

நீ ! பேரழகி! நாட்டிய ராணி! ஒருவகையான மென்மை உன்னிடம் உள்ளது. இவை எல்லாம் என் மனைவியிடம் இல்லை என்று சிவாஜி பதில் சொல்லுவார்.

சற்று பொறுங்கள் என்று கூறிய பத்மினி ஒரு தட்டு நிறைய பலவகையான இனிப்புகளை கொண்டு வந்து வைத்து இவற்றை உண்டு எது சிறப்பு மிகுந்தது என்று சொல்லுங்கள் என்று வினவுவார்?

எல்லாம் இனிப்புதான் என்று சாப்பிட்ட சிவாஜி சொன்னதும் பத்மினி பதில் சொல்லுவார். வடிவங்கள், சிறிது மாறுபட்டாலும் இனிப்பையே வழங்கும் இந்த இனிப்பை போல்
...... என்று கூறி முடிப்பார்.

மனிதன் தன் தேவைகளுக்காக மற்ற பெண்களின் பெண்மையை விலைபேசுவது ஒரு நாகரிகம் பெற்ற சமூகத்தின் கூறாக தெரியவில்லை. எந்த பெண்ணும் நாளும் வேறு, வேறு ஆணுடன் வெறும் பணம் மட்டும் கருதியே தன் உடல் வழங்க மாட்டாள்!

நடிகர் சிவகுமார் அவர்கள் தான் வாழ்ந்த தமிழ் திரை உலகில் மனைவியை தவிர வேறு எந்த பெண்ணையும் நாடியதில்லை என்று உரக்க கூறுகிறார்! இது அல்லவோ வள்ளுவன் விரும்பிய பேராண்மை?

நேற்று என் நண்பர்களுடன் ஒரு விவாதம் "விபசாரம் சட்டமாக்குவது பெண்களுக்கு பாதுகாப்பா? இல்லையா?"

சட்டமாக்கினால் பெண்ணை விலை பேசும் கயவர்க்கு உரிமை வழங்கியது போலாகாதா?
சட்டம் இல்லாத காரணத்தால் வாடிக்கையாளன், காவலன், மற்றும் பெரும்பாலானவர் இந்த பெண்களை இம்சிப்பதை வெளியில் சொள்ளமுடியாமை ?

இப்படி இருவகையான சிந்தனை!

ஆனால் எந்த ஆணும் தன் குடும்பபெண் எந்த காரணம் கொண்டும் (அவன் எந்த நாடானாலும்) விபசாரம் செய்வதை விரும்புவதில்லை. எந்த தாயும் தன் மகள் விபசாரம் செய்வதை விரும்பவதில்லை.

காணும் பெண்களை தம் உறவாக நினைத்து அன்பு செய்தால் அவர்களை இச்சை பொருளாக காணும் உளபோக்கு நிச்சயம் மாறும் என்பதில் ஐயம் இல்லை,.

குறைந்த பட்சம் வறுமை காரணமாக தொழிலுக்கு வரும் பெண்களை பணம் கொடுத்து விலை பேசாமல் அவர்கள் வாழும் வழி காட்டுவோம்.

தீபாவளி நாம் கொண்டாடலாமா?

2009-10-17T09:47:00.000-07:00

நாம் தீவாளி கொண்டாடுவது சரியா?
நான் பணி செய்யும் இடத்தில் பல காலமாக என்னை சுற்றி வட இந்தியர்களே வாழ்கின்றனர். இவர்களுடன் நான் பழகுகிறேன். நட்பும் பாராட்டுகிறேன்.
இவர்களின் நட்பு வட்டத்துக்குள் நான் இருக்கின்றேன். இந்திய திருவிழா காலங்களில்
இவர்களுடன் சேர்ந்து உண்டு மகிழ்ந்து இருக்கின்றேன்.

இவர்களுடன் இந்திய அரசு செய்யும் ஈழத்தமிழர்களுக்கு எதிரான செயல்களை சுட்டிக் காட்டுகிறேன். இதில் எங்களுக்குள் முரண்பாடு உண்டு. எனக்கு இந்தி தெரியாததை அவர்கள் எப்படி எடுத்து கொண்டாலும் என்னால் அவர்களுடன் இயல்பாக பழக முடிகிறது.

ஆனால் தீபாவளி போன்ற பண்டிகைகளை என் உளமார என்னால் கொண்டாடமுடிய வில்லை. என் முன்னோரை அழித்ததற்காக கொண்டாடும் விழாவாக என்னால் எப்படி ஏற்று கொள்ளமுடியும்?

தீபாவளி என்ற " இருளகற்றி ஒளி ஏற்றும்" நிகழ்வாக என்னால் இந்த விழாவை கொண்டாடமுடியும்.

எத்துணை பேர் இந்த மாதிரியான நாட்களில் தாங்கள் இத்தனை நாட்களில் கொண்ட தவறான எண்ணங்களை மாற்றிக் கொள்ள முனைகிறோம்?

நாம் வாழ்வது நிச்சயம் சில காலம். இந்த நாட்களில் நம்மை சுற்றி இருப்போருடன் இயல்பாக பழகுவதில் நாம் வெற்றி அடையலாம்.

இன்று என் நண்பன் ஒருவனுடன் பேசினேன். அவன் இதைபோல் பண்டிகைகள் நிச்சயம் ஏற்புடையதல்ல என்கிறான். அதில் எனக்கும் உடன்பாடு உண்டு. ஆனால் என்ன செய்வது?

என் மனம் முழுதும் நாம் வாழும் இந்த உலகில் வாழும் எளிய மக்களின் துன்பம் நீக்கும் முயற்சி எதுவும் என்னால் செய்ய இயலவில்லையே என்பது தான்.

என் உளத்தில் மாறாமல் எந்த நிலையிலும் இது உறுத்திக் கொண்டே இருக்கும்.

முந்திரி பர்பி!

2009-10-15T07:45:00.000-07:00

காஜு கத்லி செய்யலாம்னு 200 கிராம் முந்திரி வாங்கிகிட்டு வந்து வலைபக்கங்களில்

செய்முறை தேடினேன். நிறைய வந்தது.

எல்லாவற்றின் பொதுவான விஷயம்
சர்க்கரை =முந்திரி(எடை)
சர்க்கரை ஒரு கம்பி பாகு பதம் வேண்டும்!
முந்திரி ஊற வைத்து தண்ணீர் இல்லாமல் அரைத்து வைக்கவும்.
சர்க்கரை பாகில் அரைத்த முந்திரி கலந்து மெது வெப்பத்தில் கிண்டி
சப்பாத்தி மாவு பருவம் வந்ததும் தட்டில் கொட்டி சப்பாத்தி கட்டையால் சமன் செய்து
விள்ளல் போடவும்.

இதை தான் நானும் செய்தேன். எங்கோ எதிலோ தவறு! எனக்கு குழம்பு தான் கிடைத்தது. சற்று மேலும் கிளறி குளிர்பதனம் செய்தால் இறுகும் என்று ஒரு குறிப்பு இருந்தது. அதுவும் செய்தேன். ஆனால் எனக்கு அல்வா போல் எதோ வந்தது.

நல்ல செய்முறை யாராவது சொல்லுங்கள். இல்லாட்டி எங்க தப்புனாவது சொல்லுங்கள்.

மரணம் நம்மை நெருங்காது

2009-10-15T07:16:00.000-07:00

பிறர் துயரை தன் துயராய் எண்ணி வாடி
அவர் தம் துன்பம் தீர்க்க தன் நலனையும் விடுத்து
பாடுபடும் உள்ளம் கொண்ட மனிதனை மரணம்
நெருங்கவும் அஞ்சும்!

நான் இழந்த பதவி, சுகம், எல்லாம் மீண்டும் பெற அம்பாளை பிரார்த்திக்கிறேன்.

பூசாரியை கூப்பிட்டு பால்,பழம் உள்ளிட்ட பலவாறு அபிசேகம் செய்து பலதரப்பட்ட உணவு பொருட்களை நெய்யுடன் யாகத்தில் இட்டு (பட்டு, மேலும் பல ஆபரணங்களும் அடங்கும்) அம்பாளை வேண்டினால் அவள் நீ வேண்டாததையும் சேர்த்து தருவாள்.

இந்த தீபாவளிக்கு பிரத்தியங்கரா தேவிக்கு பதினாயிரம் எண்ணிக்கை கொண்ட இனிப்புகளை யாகத்தில் இட்டு எரித்து அந்த நறுமணத்தை அம்பிகை நுகரச் செய்து படைத்தால் இந்த உலக வாழ்வின் எல்லா துன்பம் நீங்கி நாம் வாழ நலம் செய்வாள்.

மனிதர்களே! நீங்கள் எப்போது உங்கள் சிந்தனை வழி செல்வீர்கள்?
இன்னொருவன் சொன்னதை சத்தியம் என்று நம்பி உங்கள் அறிவினை அடகு வைத்து
வாழும் நிலையை என்று மாற்றிக் கொள்வீர்கள்?.

பக்தி என்பது கடவுளை விலைக்கு வாங்குவதிலா? அல்லது பூசாரிக்கு படியளப்பதிலா?
வேதம்,வேதம் என்று பாடும் மனிதர்களே!
உங்கள் எதிரில், உங்கள் பக்கத்தில்
நீங்கள் வாழும் இந்த உலகத்தில்,
உண்ண உணவின்றி மடியும்
பச்சை குழந்தைகளுக்காக என்றாவது
உங்கள் கண்களில் இருந்து சிறு கண்ணீராவது வருமா?

அவன் விதி என்று எளிதில் விட்டு விடும்
உங்கள் நிலை இப்படியே இருந்து விடுமா?

வலிக்கிறது நெஞ்சம்!

2009-10-14T09:35:00.000-07:00

நாங்களும் வெடிப்போம் பட்டாசு
இந்த தீபாவளி மட்டும் அல்ல!
வரும் எல்லா தீபாவளிகளும்!
தமிழனுக்கு பிள்ளையாகப் பிறந்த ஒரே காரணத்துக்காக,
எப்போதோ யாரோ செய்த தவறுக்காக இப்போதும்,
துன்பத்தையே வாழ்க்கையாக கொண்டு வாழும் என்
மக்கள் பற்றி எமக்கு எந்த அக்கறையும் இல்லை!

எம் தொடக்கம் மறந்த மனிதர் நாங்கள்!
எம்மை நாய்கள் என்றும் வீணர் என்றும் பிறர் சொல்லும் போதும்
அவர் கால்பிடித்து வாழும் மனிதர் நாங்கள்.
தேர்தலுக்கு தேர்தல் மட்டுமே எங்களை நேசிக்கும் தேசிய கட்சிகள்!

எப்போதாவது யாராவது தமிழன் பெயர் கொண்டவன் பரிசு பெற்றால் தாமே பெற்றது போல் அகம் மகிழும் முட்டாள் மனிதர்கள் நாங்கள். இப்போது மட்டும் கருணாநிதி இவரை தமிழர் என்கிறாரே! என்றும் கேள்வி எழுப்புவோம் நாங்கள்!

எம் மொழி படித்து எம் மண்ணில் நாங்கள் எம் சிந்தனையோடு வாழ வழியற்று தேசிய மொழி படித்து நாய் வாழ்க்கை வாழும் வரையிலும் நாங்கள் உணர்வு பெறப் போவது இல்லை.

தாய்மடியில் தன் நிலை மறந்து வாழும் எங்கள் வாழ்வும் ஒரு வாழ்வா?
எங்களுக்குள்ளே பல பல பிரிவு!
பெயரில் அழித்த சாதியை நெஞ்சத்தில் எழுதி,
சாமிக்கும், அதன் பரிவாரங்களுக்கும் பயந்து
ஆசாமியை நம்பி பரிகாரங்கள் செய்து
வாழும் மனித சமூகத்தின் பேர் தான் தமிழர்.

நாங்கள் கற்றவர்கள் வள்ளுவத்தையும்,பாரதியையும்
தேர்வுக்கு மட்டும்.

சொந்த சகோதரர்கள் துன்பத்தில் சாதல் கண்டும் சிந்தை இரங்காரடி கிளியே!

இவர்களுக்கு பதில் எழுதியே என் காலம் போய்டுமோ?

2009-10-12T02:46:00.000-07:00

சமீபத்தில் ஒரு பதிவு இட்டேன். புதன் என்னைக் காப்பான் என்று?
இந்த பதிவு எதற்கு?
ஜோதிடம் பகுதியில் சிலர் தங்கள் சொந்த அனுபவங்கள் என்று இட்டுகட்டும் கதைகளை கேலி செய்யும் ஒரே நோக்கம்!

ஆனால் அவர்கள் மாறுவார்களா?
இன்று மேலும் ஒரு பதிவு. செவ்வாய் தோசத்தால் பிரிந்த காதலர்கள் !
அய்யா சாமிகளா! உங்கள் பதிவுகளுக்கு பதில் எழுதியே என் காலம் போய்டுமோ?
எப்படி உங்களால் வெட்கம் இல்லாமல் தவறான செய்திகளை அன்னை தமிழ் மொழியில் வெளியிட முடிகிறது?

விபசாரம் செய்பவனை மன்னிக்கலாம்.(அது உடலோடு மட்டுமே)
தன் உள்ளம் அறிந்து கயமையுடன் தவறான சிந்தனைகளை பரப்பும் மனிதர்களை நாம் என்ன செய்வது?

தயவு செய்து இனிமே காதலிக்கிறவங்க ஜாதகம் பார்த்து காதலிங்க ராசா!

புதன் என்னைக் காப்பான்!

2009-10-09T03:52:00.000-07:00

என்னுடைய ஜாதகத்தை ஒரு பிரபல ஜோதிடரிடம் கொண்டு சென்று கொடுத்தேன்.
அப்போது எனக்கு 17 வயது. +2 தப்பி தவறி பாசாகி விட்டேன். மேற்கொண்டு என்ன படிக்கலாம்? என் ஜாதகப்படி நான் என்ன படித்தால் எனது எதிர்காலம் நல்லா இருக்கும்னு தெரிஞ்சிக்க உங்களை பார்க்க வந்தேன் என்று அவரிடம் சொன்னேன்.

முன் பின் எங்களுக்குள் எந்த பழக்கமும் இல்லை. இவர் ஒரு பிரபல ஜோதிடர் என்று எங்கள் ஊர் மக்கள் சொல்லி இருந்தனர். அதனாலே இவரிடம் வந்தேன்.

இவரைப் பார்க்க மிக நீண்ட வரிசையில் மக்கள் காத்துகிடந்தனர். எனவே அவர் குறிப்பிட்ட இரண்டு கேள்விகள் மட்டுமே ஒரு தடவை கேட்கலாம் என்று சொன்னார்.

அய்யா எனக்கு வக்கீல் ஆகனும்னு ஆசை. என் ஜாதகப் படி நான் வக்கீல் ஆக முடியுமா சொல்லுங்கள் என்றேன். அவர் எனது ஜாதகத்தை பலமுறை பார்த்து உனக்கு பேச்சுத்திறன் உன் ஜாதகப்படி இல்லை. ஆனால் இரும்பு தொழில் உனக்கு சரி. (கவனிக்க, அப்ப எல்லாம் engineer தொழில் இல்லை) நீ எப்படியாவது பணம் கட்டி mechanical engineer சேர்ந்துடு புதன் உன்னைக் காப்பாத்துவார். பெரிய சாதனை எல்லாம் செய்வ அப்படின்னு சொன்னதுனால

இப்ப நான் ஒரு பிரபல தனியார் கல்லூரில நாலாவது வருஷம் படிச்சிகிட்டு இருக்கேன்,
என்ன ஒரு விசயம்னா ரொம்ப அரியர் இருக்கு.

இருந்தாலும் புதன் மேல பாரத்த போட்டுட்டு படிக்கிறேன்.

பாப்போம்.

ஓட்டுகள்

2009-10-07T08:06:00.000-07:00

நான் tamilish நீண்ட காலமாக பார்த்து வருகிறேன். இப்போது தான் இடுகைகள் இட முயற்சிக்கிறேன். எனது இடுகைகளையும் நீங்கள் எதோ போனால் போகட்டும் என்று publish செய்கிறீர்கள்.

ஆனால் எனக்கு ஒரு கேள்வி. அது எப்படி 10 வாக்குகளுக்கு மேல் எனது இடுகைகளுக்கு வாக்குகள் வருவதில்லை?

நான் நிறைய இடுகைகள் படித்தாலும் செல்வி கலகலப்ரியா அவர்களின் இடுகைகளை தொடர்ந்து வருகிறேன். அவருக்கு குவியும் வாக்குகள் சொல்லி மாளாது.

அதேசமயம் அவரது சில இடுகைகளுக்கு நிறைய பின்னூட்டங்கள் வரும். ஆனால் வாக்குகள் வருவதில்லை. எனவே முன்னணி இடுகை வரிசை அடைவதில்லை. இந்த சில இடுகைகள் ஒன்றும் தரத்தில் குறைந்தவை அல்ல.

மேலும் பலரது இடுகைகள் இதேபோல் தான். என்ன காரணம்?

அன்போடு வாழ நான் விரும்புகிறேன்!

2009-10-07T05:00:00.000-07:00

நான் எல்லா உயிர்களையும் அன்போடு நேசிக்க ஆசைப்படுகிறேன்!
பாம்பினை கண்டு பயம் கொள்ளாமல் என்னால் இருக்க முடியாது.
வள்ளுவரே சொல்லி இருக்கிறார். பயப்பட வேண்டியவற்றிற்கு பயம் கொள்ளுதல் வேண்டும் என்று.

நாய் பற்றி ஒரு இடுகை இட்டு இருந்தேன்.

இன்றைய தினமலர் செய்தி பாருங்கள்.

http://www.dinamalar.com/new/Incident_detail.asp?news_id=13238

விலங்கு பாதுகாப்பு சங்கத்தினர் மிக முயற்சி கொண்டு நாய்களுக்காக போராடி வருகின்றனர். இந்த உறுப்பினர்கள் பெரும்பாலும் சமூக மேல்தட்டு மனிதர்கள் ஆதலால் சாதாரண மக்கள் தெரு நாய்களால் படும் அவதி இவர்களுக்கு தெரியாது.
சாதாரண மக்களே தெரு நாய்களுக்கு உணவு அளித்து பராமிப்பவர்களாகவும் இருப்பது தான் இந்த கீழ்தட்டு மனிதர்களின் இயல்பு வாழ்வுக்கு சான்று.
ஆனால் அவர்களுக்கு இந்த உயிர்களுக்கு வேண்டிய பாதுகாப்பு மருந்துகளை அளிக்க கூடிய தேவையான பணமோ, அதைப் பற்றிய விழிப்புணர்வோ இல்லை.

நம்மால் இயன்றவரை தெரு நாய்கள் பெருகாமல் செய்வோம்.(தைரியம் உள்ளவர்கள் இந்த நாய்களை தத்து எடுத்துக் கொள்ளலாம்)

தினமலர் செய்தியை இங்கு ஒட்டுகிறேன்.

உடுமலை: சுற்றித் திரியும் "வெறி நாய்'களால், பொதுமக்களும், வாகன ஓட்டிகளும் தொடர்ந்து பாதிக்கப்பட்டு வருகின்றனர். சிறுவனின் கழுத்தை வெறிநாய் கடித்ததில் ஆபத்தான நிலையில் சிகிச்சை பெற்று வருகிறான்.

உடுமலை நகராட்சி மற்றும் சுற்றுப்புறத்தில் உள்ள கணக்கம்பாளையம், பெரியகோட்டை, கண்ணமநாயக்கனுர், போடிபட்டி உட்பட பல ஊராட்சிகளில் நூற்றுக்கணக்கான வெறி நாய்கள் சுதந்திரமாக சுற்றி வருகின்றன. ரோடுகளில் நடந்து செல்லும் மக்களையும், வாகனங்களில் செல்பவர்களையும் குறிவைத்து, கடித்து வருகின்றன. உடுமலை நகராட்சி பகுதிகளில், சுற்றித் திரியும் வெறி நாய்களுக்கு குடும்பக் கட்டுப்பாட்டு சிகிச்சை செய்யப்பட்ட நிலையிலும், வெறிநாய்களின் எண்ணிக்கை குறையவில்லை.

தினமும், பலர் வெறி நாயால் கடிபட்டு மருத்துவமனைக்கு செல்லும் அவலம் தொடர்கிறது. உடுமலை ஜீவா நகர் பகுதியில் சுற்றித் திரிந்த வெறிநாய், பல நாட்களாக அவ்வழியே, சென்றவர்களை கடித்து வந்துள்ளது. நேற்று முன்தினம், ஐந்து வயதான காளீஸ்வரன், நடந்து சென்றபோது, சிறுவனின் மீது பாய்ந்து கழுத்து, முகம், உடல் பகுதிகளை வெறிநாய் கடித்தது. அருகிலிருந்தவர்கள் சிறுவனை மீட்டு உடுமலை அரசு மருத்துவமனையில் சிகிச்சை அளித்து, வீட்டிற்கு அழைத்து சென்றனர்.

இந்நிலையில், இரவு, கடும் காய்ச்சலுடன், செய்கைகளில் வித்தியாசம் தெரிந்ததால் உடனடியாக அரசு மருத்துவமனையில் சிகிச்சைக்காக சேர்க்கப்பட்டான். தற்போது, உடுமலை அரசு மருத்துவமனையில் உள்நோயாளியாக சிகிச்சை பெற்று வரும் காளீஸ்வரன், கடுமையான காயங்களுடன் இருப்பதோடு, அதிர்ச்சியிலிருந்து மீளாமல் வெறித்தபடியே அமர்ந்துள்ளான்.

நன்றியுள்ள நாய்கள் !

2009-10-05T07:27:00.000-07:00

என் சிறு வயது முதல் நாய்கள் என்றால் உள்ளுக்குள் ஒரு அச்சம்.
கடித்து விட்டால் நமக்கு ராபிஸ் வந்து விடும் என்பதில் அதீத நம்பிக்கை.
எனவே நாய் இருக்கும் பக்கமே போக மாட்டேன்.

ஆனால் விதி யாரை விட்டது?
சென்னை தெருக்களில் திரியும் நாய்களிடம் இருந்து நாளும் விலகி செல்வதே மிகவும்
பயங்கரமானது. தூங்கி கொண்டு தான் இருக்கின்றன என்று மிக மெதுவாக அந்த இடத்தை விட்டு நகரும் நிலையில் ஒரு குரைப்பு செய்யும் இந்த நாய் அந்த பகுதி நாய்களை எல்லாம் தன் படை பலத்தில் சேர்த்துக் கொள்ளும். மிக வேகமாக நடக்கவும் பயம். நிற்கவும் பயம். மிக நிதான நடை வேண்டும் இங்கே!

இந்த விலங்கு பாதுக்காப்பு சங்க உறிப்பினர்கள் தெரு நாய்களை நகராட்சி பிடித்து செல்லக் கூடாது என்று சொல்வதில் நம் எத்தனை பேருக்கு உடன்பாடு இருக்க முடியும்?
சில நேரங்களில் சிறுவர்,சிறுமியரை இவை கடித்து செய்யும் இம்சைகளுக்கு அளவில்லை.

வேறு வீடு வாடகைக்கு பெயர்ந்தோம். அங்கு பக்கத்து வீட்டில் ஒரு நாயை வளர்த்து வந்தனர். அது புதிதாக யார் வந்தாலும் குரைக்க ஆரம்பித்து விடும். அதை பார்கவே மிக பயமாக இருக்கும். அதன் உயரமே நம் இடுப்பை தாண்டி விடும். அதை அவர்கள் கொஞ்சும் அழகே தனி. நான் அதன் அருகில் ஒரு நாளும் சென்றதே இல்லை.

நாய் வளர்ப்பவர் எல்லோரும் சொல்லும் ஒரு வாக்கியம் "எங்கள் ........(பெயர்) ரொம்ப நல்லது. யாரையும் கடிக்காது. (அப்புறம் எதற்கு வாசலில்)" பயப்படாதீர்கள்.

சரிதான். உங்கள் நாய் நல்ல நாய் என்று உங்களுக்கு தெரிகிறது. நாய்க்கு அது தெரியுமா?
அல்லது என் மனம் தான் அதை நம்புமா? பார்க்கும் போதே குலை நடுங்கி விடுகிறது.

சில நாட்கள் முன் சென்ட்ரல் சென்று இருந்தேன். அங்கு வெடிகுண்டு கண்டுபிடிப்பதற்காக நாய்களுடன் காவலர்கள் நிலையத்தை வலம் வந்து கொண்டு இருந்தனர். நான் வண்டியில் ஏறும் சமயம் உள்ளிருந்து ஒரு நாய் என் மேல விழும் வண்ணம் வந்தது.

என்னால் இந்த அதிர்ச்சியை தாளவே முடியவில்லை.

நாகரிக சமூகத்தில் வாழும் நாம் ஒரு பிள்ளைக்கு பாதுகாப்பு அளிக்க தயங்கும் நாம் நாய்கள் வளர்க்க மட்டும் தவறுவது இல்லை. அவற்றை பராமரிக்க நாம் மிக அதிக செலவு செய்கிறோம். ஆனால் ஒரு அநாதை குழந்தைக்கு உதவி செய்ய மறுக்கிறோம்.
நம் இல்லங்களில் பணி செய்யும் வேலையாட்களுக்கு ஊதியம் தருவதில் சிக்கனம் கடைப் பிடிக்கும் நாம் நம் நாய்களை சுகபோகமாக வளர்ப்பதில் குறை வைப்பது இல்லை.

katharikaai kulambu!

2009-10-05T06:50:00.000-07:00

சில நாட்கள் முன்பு எனது நண்பர்களை என் வீட்டுக்கு சாப்பிட அழைத்திருந்தேன்.
ஆனால் அவர்கள் இந்திய உணவை உண்ண இயலாதவர்கள்(காரம் கிட்டே வரக்கூடாது)

இவர்களுக்காக நான் சமைத்த ஒரு குழம்பு இங்கே

கத்தரிக்காய் குழம்பு!
மிளகாய் ( 0 gram)
கொத்தமல்லி (2 tea spoon)
மூன்று வகை பருப்புகள்(துவரம்,உளுந்து,கடலை)
வெந்தயம், சீரகம்,மிளகு சிறிது
இவற்றை நல்ல முறையில் வறுத்து அரைத்து வையுங்கள்.

மிக முக்கியமான மாற்றமாக தேங்காய்க்கு பதில் நான் இங்கு கேரட்டை துருவி வணக்கி
அரைத்து வைத்துக் கொண்டேன்.

இப்பொழுது வெங்காயம், கத்தரிக்காயை சிறு துண்டுகளாக அரிந்து கொண்டு எண்ணை விட்டு கடுகு தாளித்து, வெங்காயம் போட்டு நன்றாக வணங்கியபின் கத்தரிக்காய்களை இட்டு மேலும் சிறிது எண்ணை விட்டு வணக்கியதும் தக்காளி(நன்றாக பழுத்த) மூன்று போட்டு தண்ணீர் விட்டு கொதிக்க விடவும். இந்த வேளையில் அரைத்து வைத்த பொருட்களை(கேரட், குழம்பு தூள்) இதில் இட்டு நன்றாக கொதித்து வந்ததும் தாளித்து இறக்கவும்.( தோசைக்கு நன்றாக இருந்தது)

உளறல்கள்!

2009-10-01T10:19:00.000-07:00

முதுமை

சாய்வு நாற்காலியில் தெரிந்தது ஊஞ்சலின் சுகம்!
பேரன் அழுகையில் தெரிந்தது பிள்ளையின் வலி!
பேத்தியின் கொஞ்சலில் தேனின் சுவை !
கைத்தடியில் புரிந்தது கால்களின் தேவை!
மருமகளின் கோபத்தில் தெரிந்தது மனைவியின் பொறுமை!
கண்ணாடியில் தெரிந்தது காலத்தின் கோலம்!
மாலையில் புரிந்தது காலையின் புதுமை!

வெண்மை
இறை நேசர் : இறைவனின் உள்ளம்
சகுனம் பார்ப்பவன்: அமங்கலம்
பெண்: விதவையின் துயர்
அரசியல்வாதி: சட்டை
அறிவியலாளன் : நிறங்களின் ஒருமை
பண்பாளன்: சத்தியத்தின் ஒளி

வாழ்வில் ஒரு நாள்!

2009-09-30T10:08:00.000-07:00

பள்ளி விட்டு வீட்டுக்கு வந்தான் வளவன். தங்கை கமலமும், ரகுவும் விளையாடிக் கொண்டு இருந்தவர்கள் இவன் நிழல் தெரிந்ததும் பாய்ந்து கட்டிக் கொண்டனர்.
அண்ணா! அண்ணா! என்னைத் தூக்கு! என்று ஆரவாரம் செய்தனர். கை, கால் கழுவி வந்தவன் இருவரையும் தூக்கிக்கொண்டு தட்டாமாலை சுற்றினான்.

காட்டு வேலைக்கு சென்ற அம்மா இன்னமும் வீடு வரவில்லை. அப்பா எதோ கூலி வேலை செய்து வந்தார். இவனுக்கு பசி. வீட்டில் என்ன இருக்கிறது என்று பார்த்தான். காலையில் வடித்த சோறும், மூன்றாம் நாள் வைத்த புளிக் குழம்பும் ஒரு தட்டில் போட்டு எடுத்து வந்து மூவரும் உட்கார்ந்து ஆளுக்கு ஒரு வாய் சாப்பிட்டனர். மூவரின் வாயில் இருந்து ஒழுகிய சோறு அந்த தட்டில் எஞ்சி இருந்தது. அதனையும் உண்டு கை கழுவினான்.

அம்மா வர இன்னம் வேளை இருந்தது. அடுப்பு பற்றவைத்து உலை வைத்து அரிசி களைந்தான். பொழுது இருட்டும் வேளையில் அம்மா வந்தாள். துணிமுடிப்பில் எடுத்து வந்த கரிசலாங்கண்ணி கீரையை அம்மாவும் மகனும் ஆய்ந்தனர். மண்ணெண்ணெய் விளக்கு சற்று மங்கலாக எரிந்ததால் கடைக்குப் போய் எண்ணை வாங்கி வந்து ஊற்றினான்.

சமையல் வேலை முடிய இரவு ஒன்பது ஆகி விட்டது. சின்னது இரண்டுக்கும் சோறு ஊட்டி படுக்கை விரித்தாள் அம்மா. அப்பா வரும் அரவம் கேட்டது. அன்றைய வேலைக் களைப்பு அவர் முகத்தில் அந்த இருட்டிலும் தெரிந்தது, கூடவே கெட்ட சாராய நெடியும்.

இவனை அருகில் அணைத்து முத்தம் கொடுத்தார். இவன் தன் முகத்தை திருப்பிக் கொண்டான். அவரை விட்டு வெடுக்கென விலகி வந்தான். இரண்டு நாட்கள் முன்புதான் இவனிடம் சத்தியம் செய்து இருந்தார் " இனிக் குடிக்க மாட்டேன் என்று". இன்று மீண்டும்.
இவனுக்கோ குமட்டிக் கொண்டு வந்தது. இதைகேட்டே ஆகவேண்டும் என்று முடிவு செய்தான். அதற்குள் அம்மா இவனிடம் இது எதையும் கேட்காதே என்று முனு முனுத்தாள். என்னடி அங்க குசு! குசு!னு பேச்சு என்று அப்பா சத்தம் போட்டார்.

ஒன்றும் இல்லை! என்று பதில் சொல்லிவிட்டு சாப்பிட தயார் செய்ய உள் எழுந்து போனாள். அந்த நேரத்திலும் அம்மா கடைந்த கீரை மணத்தது. அப்பாவின் தட்டில் சோறு போட்டு கீரை வைத்தாள். ஒரு வாய் பிசைந்து உண்டவர் என்னடி உப்பு கூட போடத் தெரியாதா? எத்தனை தடவை சொன்னாலும் இப்படி தானா என்று சற்று தொனி ஏற்றி கேட்டார். நான் பார்க்கும்போது சரியாகத்தான் இருந்தது. இதோ நீங்கள் வேண்டும் அளவு போட்டு கொள்ளுங்கள் என்று உப்பு கிண்ணத்தை அருகில் வைத்தாள். ஏண்டி! நான் என்ன சொரணை கெட்டவனா என்று உப்பினை அந்தப் பக்கம் தள்ளி வைத்தார்.

வீட்டில் அரிசி தீரபோகுது அரிசி வாங்க பணம் வேண்டும் என்று இவன் ஆரம்பித்தான். அம்மா இவனை தீரா கோபத்துடன் பார்த்தாள். என்னடா! உங்களுக்கு எவ்வளவு கொடுத்தாலும் விடியாதா? என்று அவர் எகிறினார். இப்போது அவர் பேசும் பேச்சுகள் கேட்டு அவன் காதுகள் கூசிப் போயின.

கோபத்தில் அவர் முன்பு இருந்த சோற்றுப் பாத்திரங்களை விசிறி அடித்தார். பதிலுக்கு அம்மா எதோ சொல்லப் போக இவர் எழுந்து காலால் உதைக்க முனைய இவன் குறுக்கே விழுந்து தடுத்தான். இவனை ஒரு அறை அறைந்து அம்மாவை ஒரு உதை விட்டார். அம்மாவிடம் இருந்து விசும்பல் மட்டுமே வெளி வந்தது. ஆக்கிய சோறும், கீரையும் அந்த அறையின் நாற்புறமும் சிதறிக் கிடந்தன.

இவனுக்கு பசியும் அடியும் சேர்ந்து தலைவலியை உண்டாக்கி விட்டன. அப்பா வெளியில் கிடந்த கட்டிலில் படுத்துக்கொண்டார்.

என்றும் இனியவை!

2009-09-28T09:00:00.000-07:00

என் உள்ளத்தில் என்றும் மகிழ்வையும் , இன்பத்தையும் ஏற்படுத்தும் சில!

எழு ஞாயிறு
உயர்ந்த மலைகள்
மழை மேகம்
பெய்யும் மழை
விரிகடல்
அலையோசை
பனிப்புல்
இளந்தளிர்
மலர் மொட்டு
மலர்ந்த மலர்,
பறவைகளின் பேச்சு
மழலை சிரிப்பு,
புன்னகை(எங்கிருந்து வந்தாலும்)
பூரண அறிவு (சிவாஜியின் நடிப்பு)
பேரமைதி

இன்னும் நீளமாகலாம். இங்கேயே முடிக்கிறேன்

சிக்கனம் தேவையா?

2009-09-27T11:41:00.003-07:00

நாம் வாழும் இந்த பூமியில் உள்ள எல்லோரும் ஒரே மாதிரி வசதிகளுடனும் தேவைகளுடுனும் வாழ்வதில்லை.

நமக்கு எது விருப்பமோ அது பிறருக்கு வேண்டாததாக இருக்கிறது.

ஆனால் நம் எல்லோருக்கும் தேவையான காற்று, நிலம், நீர் இந்த மூன்றினையும் நமது வருங்காலத்துக்கும் விட்டு செல்ல வேண்டிய கடமை நமக்கு உண்டு.

ஆனால் என்ன நடக்கிறது இங்கு?

எவன் கையில் இவை முதலில் கிடைக்கிறதோ அவன் இவற்றை நாசம் செய்வதில் முதன்மை பெறுகிறான்.

ஐந்து நக்ஷத்திர ஓட்டல்களில் மிக தரமான தண்ணீர், காற்று, நிலம் எல்லாம் பணம் படைத்தவனுக்கு கிடைக்கிறது.

ஆனால் இந்த ஒன்றும் இல்லாத பன்னாடை இருக்க இடம் இல்லாமல் குடிக்க நீர் இல்லாமல் தவிக்கிறான்.

இவன் சிக்கனம் செய்து என்ன செய்து விட முடியும்?
இவனிடம் கிடைப்பதே கொஞ்சமோ கொஞ்சம். அதில் இவன் எதை சிக்கனம் செய்வான்?

பணம் படைத்தவன் மட்டுமே நாம் வாழும் இந்த உலகின் எதிர்காலத்தை நிச்சயம் செய்கிறான்.(இங்கு பணக்கார நாடு உட்பட)

இவர்களிடம் சிக்கனம் செய்ய சொல்லுங்கள். அதனால் நிச்சயம் பயன் உண்டு.

ஆனால் இவர்கள் கேட்பார்களா?

தங்கள் உரிமைப் பொருட்களை என்ன செய்யவும் தெரியும் இவர்களுக்கு, பயன்படுத்தாமல் குப்பையில் போடும் வள்ளல்கள் இவர்கள்.

செய்தி!
1.2 litre தண்ணீரில் குளித்ததாக (தண்ணீர் சிக்கனம் வலியுறுத்தி ) ஒருவர் சொல்கிறார்.

இதனால் பயன் என்ன? ஐந்து நக்ச்சதிர முதலாளிகள் சிக்கனம் செய்து விடுவார்களா?

மக்களே! ஒன்று புரிந்து கொள்ளுங்கள். சிக்கனம் உள்ளிட்ட எல்லா உபதேசங்களும் ஒன்றும் இல்லாத பன்னாடைகளுக்கு! நமக்கல்ல!.

தமிழ் கேட்டு என் உள்ளம் கொதிக்குது!

2009-09-27T08:43:00.000-07:00

தமிழகத்தில் ஆங்கிலத்தில் புலமை பெற்று வாழும் மக்கள் சாதாரண தமிழக மக்கள் பேசும் ஆங்கிலம் அவர்கள் காதில் கொடூரமாக இருப்பதாக குற்றம் சாட்டுகின்றனர்.

தேள் இவர்கள் காதில் கொட்டுவது போல் உள்ளதாம் நம்மவர் பேசும் ஆங்கிலம்.

தமிழகத்தில் தமிழனுக்கு பிறந்து வாழ்ந்து வரும் பலதரப்பட்ட இந்த நுனிநாக்கு ஆங்கிலம் பேசும் பெருங்குடி மக்கள் பேசும் தமிழ் கேட்டு என் உள்ளம் கொதிப்படைவதை எங்கு முறை செய்வது?

பிற மொழி கலக்காமல் தமிழ் பேசு என்று சொன்னால் வந்து கடிக்கும் இவர்கள் தமிழ் நாட்டில் வாழும் மக்கள் தாங்கள் பேசும் ஆங்கில சொற்களை சரியாக சொல்லாவிட்டால் ஏன் இத்தனை கொதிப்பு அடைகின்றனர்?

வேற்று மொழிக்கு வக்காலத்து வாங்கும் இந்த வீர மனிதர்கள் தம் தாய் மொழியில் என்ன தெரிந்து வைத்து உள்ளனர்.

தம் குழந்தைக்கு பேரே தம் மொழியில் வைக்காத இந்த அறிவிலிகளை என்ன செய்யலாம்?

பாரதி இருந்தால் இவர்கள் பேசும் தமிழ் கேட்டு நாய்கள் குரைக்கின்றன என்றல்லவா தம் காதுகளைப் பொத்திகொள்வான்!

பரிகாரம் செஞ்சிகிங்கோ!

2009-09-26T04:05:00.000-07:00

வாக்கிய பஞ்சாங்கப்படி, சனிபகவான் இன்று மாலை 3.27 மணிக்கு, சிம்ம ராசியில் இருந்து கன்னி ராசிக்கு பெயர்ச்சியாகிறார். நவக்கிரகங்களில் ஒருவரான சனிபகவான், இரண்டரை ஆண்டுகளுக்கு ஒருமுறை பெயர்ச்சியாவார்.

இவரே, மக்களின் ஆயுள் மற்றும் தொழிலை நிர்ணயம் செய்யும் பிரதான கிரகமாக இருக்கிறார். இவர் பெயர்ச்சியாகும் ராசிகளைப் பொறுத்து, ஒவ்வொருவரின் ஆயுளும், தொழிலும் மாற்றம் பெறும்.

இது வரைக்கும் டாக்டரா இருந்தவங்க ஆசிரியராகவும் திருடனா இருந்தவங்க வக்கீலாகவும் மாற நிறைய வாய்ப்புள்ளது. இதுவரைக்கும் நல்லா இருந்தவங்க பன்னி காய்ச்சல், புற்று நோய், மேலும் பல நோய்களுக்கு ஆளாக வாய்ப்பு அதிகம். ரொம்ப வியாதி இருந்தவங்க குனமாகிடுவாங்க. இவங்க டாக்டர பாக்க தேவையில்லை.

சனிபகவான், அவருக்குரிய சனிக்கிழமையான இன்று பெயர்ச்சியாவது விசேஷமாகக் கருதப்படுகிறது. எண் கணிதப்படி சனிபகவானுக்குரிய எண் எட்டு. இன்று 8ம் எண் ஆதிக்கம் உள்ள நாள். மேலும், இன்று எட்டாம் திதியான அஷ்டமியும் இருக்கிறது. சனீஸ்வரர், அவருக்கு உகந்த நாளில் பெயர்ச்சியாவதால், அவ்வளவாக தீய பலன் இருக்காது என கணிக்கப்பட்டுள்ளது.

சிம்மம், கன்னி, துலாம் ஆகிய ராசிக்காரர்களுக்கு இது ஏழரைச்சனி காலம். இந்த ராசியில் பிறந்தோரும், இந்த ராசிகளை லக்னமாக உள்ளவர்களும் சனிபகவானுக்கு பரிகாரம் செய்து கொள்வது நல்லது.

இதனால நாங்க சொல்றதெல்லாம் என்னனா , இருக்கற காச எல்லாம் சேர்த்து பக்கத்துல இருக்குற கோயில் பூசாரி கிட்ட கொடுத்து பரிகாரம் பண்ணிகிங்க. மேலும் பல தரப்பட்ட தானியங்கள வாங்கி இவங்க கிட்ட தந்தா எந்த துன்பமும் வராம பாத்குவாங்க.

மடையர்கள் ஜாக்கிரதை!

2009-09-25T04:41:00.000-07:00

இந்த பதிவு வலையில் வந்த பதிவுக்கு பதில் பதிவு! அங்க பின்னோட்டம் இட்டா நிச்சயம் வராதுன்னு தெரியும்.
அதனால இங்க!

நம்ப அறிவாளிங்க ஏன் நவகிரக கோயில் கட்டுனாங்கன்னு ஒரு விளக்க பதிவு பார்த்து இருப்பிங்க. அதுக்கு பதில் இங்க. மேலும் அந்த பதிவை இங்கு குறிப்பிடாமல் எழுத முயற்சிக்கிறேன். சில சொற்றொடர்கள் அங்க இருந்து பெறப்பட்டுள்ளது.
இத எல்லாம் காபி ரைட் கேட்பார்களோ? சுடப் பட்டவை சிறிய எழுத்துகள்.

"தமிழகத்தில் நவக்கிரகங்களுக்கு முக்கியத்துவம் வாய்ந்த கோவில்களும் இதே போன்ற பல நன்மைகள் கருதியே கட்டப்பட்டுள்ளன. கிரகங்களின் சுற்று வட்டப்பாதையில் அந்த இடங்கள் இவ்வாறான புவியியல் முக்கியத்துவம் பெற்றுள்ளன என்பதையே இது காட்டுகிறது."

"ஆனால் எல்லாவற்றையும் அறிவியல் கொண்டே நிரூபிக்க முடியாது. அது வாழ்ந்து பார்க்கும் போது காலத்தால் மட்டுமே நிரூபனம் ஆகும்."

அதாவது நாங்க எல்லாம் ஜோதிடம் என்கிற குப்பைய நம்பி செத்த பிறகு?

விவேகானந்தருக்கும், பாரதிக்கும் தெரியாத உண்மைய கண்டுபிடிச்ச மகானுக்கு ஒரு வணக்கம் போடுங்கப்பு!

"அவ்வளவு ஏன். ஒரு சிறிய உதாரணம் சொல்கிறேன், மகாலய அமாவாசை அன்று இறந்து போன முன்னோர்களுக்கு தர்பனம் செய்வார்களே! அப்படி என்ன விஷேஷம் அந்த நாளில் என்று தோன்றும். வருடத்திலேயே சந்திரன் பூமிக்கு மிக அருகில் வரும் நாள் அது தான். இது புவியியல் ரீதியான உண்மை".

அடேங்கப்பா? என்ன அறிவியல் கண்டுபிடிப்பு. இந்த அறிவாளிகள் எல்லாம் ஏன் ஆரியபட்டர் சொன்ன அறிவியலையும், மூட ஜோதிடத்தையும் குழப்பிக்கிறாங்க?

இது தான் இவங்க ரத்தத்திலேயே ஊரினதாச்சே!

"இன்னும் நிரூபனம் வேண்டும் என்றால், சமீபத்தில் சுனாமி வந்ததே. அப்போது அலைகளுக்கு பக்கத்திலேயே இருந்த திருச்செந்தூர் கோவிலில் சொட்டுத் தண்ணீர் கூடப் படவில்லை. ராமேஸ்வரத்தில் சுனாமி தாக்கவில்லை. இதை எந்த ஊடகங்களும் பெரிது படுத்தாமல் அமுக்கிவிட்டன. ஏனெனில் இது இந்து மதத்தைப்பற்றி இச்செய்தி உயர்வாக சொல்லிவிடுமே. அதுதான் காரணம். ஆனால் உலகையே உலுக்கிய சுனாமி ஏன் இந்த இரு கோவில்களைத் தொடவில்லை. பதில் தெரிந்தால் கூறுங்கள்?"

அங்க செத்து போன மக்கள் யார பத்தியும் கடவுளுக்கு கவலை இல்ல. அவர் கோவில் மட்டும் அப்படியே இருந்து தன்னை நிரூபிச்சி இருக்கு. என்ன தெய்வீகம்?
அங்க அவ்வளவு பெரிசா கட்டப்பட்ட திருவள்ளுவர் என்ற சிலையும் அப்படியேதான் நின்னது!

இந்து தர்மம் என்பது மனோவியலும் அறிவியலும் ஆகும்!

ஆமாம்! ரொம்ப சரி ! நாங்க அடிமையா இருக்கம்னே தெரியாம அடிமையா வாழ வைக்க தெரிந்த தர்மம் அல்லவா?

எப்பதான் மாறுவீங்க?

சமஸ்க்ரிதம் உங்க மொழிதான். எங்களுக்கு இல்ல சாமியோ!

முக்காலமும் அறிந்தவர்!

2009-09-24T04:33:00.000-07:00

எங்கள் ஊரில் ஒரு பெரியவர் இருந்தார். அவர் நல்ல ஒரு நாட்டு வைத்தியர் என்று சொல்லத்தக்க வகையில் எல்லோருக்கும் பச்சிலை கொடுத்தும் வீட்டில் உள்ள மற்ற பொருட்கள் மூலமும் பல நோய்களை தீர்த்து வைத்தவர்.

மாலை நேரங்களில் நல்ல கதைகள் சொல்வார். அவர் தான் எங்களுக்கு விக்ரமாதித்தன் கதை சொன்னவர். பட்டம் செய்ய கற்று கொடுத்தவர். மேலும் நீச்சல் கற்று தந்தார்.
சிறு பிள்ளைகளுக்கு நல்ல பல விளையாட்டு சொல்லி தருவார்.

இவர் பல வகையில் முக்காலமும் அறிந்தவர் . ஏனென்றால் எங்கள் ஊரில் எப்போது நிறைய மழை வரும் என்று முன்கூடியே சொல்வார். சுனாமி வரும் முன்னரும் எங்களுக்கு முன்னாடியே சொல்லி விட்டார். நாங்கள் தான் நம்ப வில்லை. 2100 வரும் முன்னர் இந்த உலகில் ஏற்படும் பல மாற்றங்களை பற்றி சொன்னவர்.

ஏன் இந்த முக்காலமும் அறிந்த மகான் எங்களுக்கு மந்திரம் சொல்லி தரவில்லை?
ஒரு வேளை அவருக்கு மட்டுமே அவை பலன் தருமோ?

இவர் எங்கள் ஊரில் உள்ள மற்றவருக்கு இந்த இந்த மருந்து இந்த நோயை குணப்படுத்தும் என்று சொல்லி விளக்கமாக பாடம் எடுப்பார். ஆனால் ஒரு முறையும் நாளை நடப்பதை எப்படி அறிவது என்று மட்டும் சொல்லி தரவில்லை.

ப்லாக் எழுதும் படித்த மனிதர்கள் சில பேர் இந்த பாம்பாட்டி சித்தர், மற்றும் பல சித்தர்கள் பற்றி கதை கதையாக சொல்வதை இவர் எங்களுக்கு பல முறை சொல்லி இருக்கிறார். ஆனால் இவர்கள் முக்காலம் அறிந்தவர்கள் என்று ஒரு போதும் சொன்னதில்லை.

அருணாசல மலை சுற்றினால் நல்ல உடல் வலுவும், உற்சாகமும் வரும் என்று தான் சொன்னார். இந்த சிவன் எங்களை காப்பான் என்று எப்போதும் சொன்னதில்லை இந்த முக்காலமும் அறிந்தவர்.

தான் நம்புவதை பிறர்க்கு சொல்வதில் இவருக்கு என்ன சிக்கல்?
இப்படி இருக்குமோ?

யாரோ சிலர் சொன்ன கட்டு கதையை சும்மா கதைக்காக மட்டுமே எங்களிடம் சொல்லி எப்போதும் உண்மையான விசயங்களை மட்டுமே எங்களுக்கு கற்றுக் கொடுத்தாரோ ?

அப்படினா சுனாமி வரும்னு இவர் சொன்னது கப்சாவா?

எது எப்படியோ! அய்யா புண்ணியவான்களே நீங்கள் நம்பும் முட்டாள் தனத்தை நீங்கள் நிரூபிக்க முடியுமானால் மட்டும் வலையில் இடுங்கள். இல்லாட்ட இந்த பெரியவர் மாதிரி உருப்பிடியா வேற ஏதாவது இருந்தா சொல்லுங்க. இல்லனா மூடிக்கிட்டு போங்க.

பாரதியும் , பெரியாரும்

2009-09-12T10:52:00.000-07:00

தமிழின் இருவதாம் நூற்றாண்டு அடையாளங்களில்
இவர்களைக் குறிப்பிடாமல் எதுவும் யாராலும் செய்ய முடியாது.

மனித நேயத்தில் இவர்களின் சிந்தனை மிக விரிவுபட்டது!
தனி மனித சிந்தனையில் இவர்களின் கோட்பாடு மாற்றம் இல்லாதது!
எல்லோரும் ஒரு நிறை! இது தான் இவர்களின் சித்தாந்தம்!

இருவரும் வேதத்தை ஒதுக்கி மனித அறிவுக்கே உயர்வளித்தனர்!
ஜோதிடத்தையும் , ஜாதியையும், குறுகிய எண்ணங்களையும் சாடியவர்கள்!

எல்லா மனிதனும் தன்மானத்துடன் வாழ பாடுபட்டவர்கள்!
தம் கால சமூக சீர்கேடுகளை அழிப்பதில் முன் நின்றவர்கள்!

பெண்ணிய சிந்தனையின் ஆதியும் இவர்களே!

மூட பழக்கங்களின் வேராகிய பிராமண சாத்திரங்களை சாடியவர்கள்!

இவர்கள் இருவரையும் சமூகத்தின் ஒரு குறிப்பிட்ட பிரிவினரே கண்மூடி தனமாக இறுதிவரை எதிர்த்தனர்.

தமிழைப் போற்றியவர் பாரதி. தமிழ் எழுத்து சீர்த்திருத்தியவர் பெரியார்!

கல்வி எல்லா மக்களையும் சென்று அடையவேண்டும் என்று விரும்பினர்.

இன்றைய தலைமுறைக்கு இவர்கள் இருவர் பற்றியும் சரியான வகையில் சொல்லாமல்
விட்டுவிட்டோம் நாம்.

பாரதி,பெரியார் வழி வந்த நாம் இன்னமும் நம் மூட எண்ணங்களை விட்டு விலகவில்லை,.
ஜாதி மோதல்களில் நம் காலத்தை வீணடித்து வருகிறோம்.

பிறப்பு முதல் இறப்பு வரை ஜோதிட சாத்திரங்களில் மனம் செலுத்தி நம் வாழ்வையே முட்டாள்தனமாக வீண் செய்கிறோம். ஜோதிடம் பார்பவர் நமது வழிகாட்டியாகி நம்மை சீரழிக்கிறார்.

ஜோதிடம் பார்ப்பதும், அதை மேலும் மக்கள் அறியாமையில் செல்ல பயன்படுத்துவதிலும் நம்மைப் போன்ற படித்த அறிவாளிகளே தங்களை
மேதைகள் என்று கூறிக் கொண்டு பெருமைப் படுகிறோம்.

அறிவியல் சாதனங்களை நம் முன்னேற்றத்திற்கு பயன்படுத்தாமல் நம் மூட நம்பிக்கைகளை மேலும் பரப்ப பயன் படுத்தி வருகிறோம்.

நாம் மேன்மை பெற்று வாழ வேண்டாம். குறைந்த பட்சம் அறிவுள்ளவர்களாக வாழ்வோம். மனித உணர்வுகளுக்கு மதிப்பு அளிப்போம். பெண்களை நம் நிகராக மதிப்போம்.